Ədalətli inkişafı təmin etmək istəyiriksə, ilk növbədə, ikili standartları geriyə çəkmək və hamının bərabər imkanlara sahib olduğu bir dünya qurmaq məcburiyyətindəyik.

“EDnews” xəbər verir ki ,  bu fikirləri Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” Forumu çərçivəsində təşkil olunan “Artıq ikili standartlar yoxdur: QHT-lər katalizator kimi, Qlobal Cənubda ədalətli inkişaf” mövzulu paneldə Bərpa Olunan Enerji və Enerji Səmərəliliyi üzrə Ərəb Platformasının prezidenti Kamel Esseghairi deyib.

O, Azərbaycanın zəngin təbii resurslara malik ölkə olduğunu bildirib: “Lakin bu ölkə öz səsini duyura bilməyənlər üçün daim çalışır və ədalətli inkişafı dəstəkləyir, Qlobal Cənub QHT Platformasının sədri olaraq ədalətli inkişaf məsələlərini prioritet hesab edir, bu sahədə mühüm təşəbbüsləri öz üzərinə götürüb. Ancaq bu gün reallıq ondan ibarətdir ki, az pulla çox iş görmək məcburiyyətindəyik. Bu isə bizi daha kreativ, daha çevik və daha birgə hərəkət etməyə sövq edir”.

Kamel Esseghairi əlavə edib ki, iqlim dəyişikliyi ilə bağlı məsələlərdə QHT-lərin rolu xüsusilə önəmlidir. Onların cəmiyyətlə birbaşa əlaqəsi, yerli səviyyədə yaratdıqları təsir və təşəbbüsləri dəstəkləmək qlobal dəyişikliklər üçün vacibdir.

“Eyni zamanda, yoxsulluğun azaldılması və səhiyyə xidmətlərinə çıxışın yaxşılaşdırılması kimi fundamental problemlər hələ də qarşımızda durur. Biz bu problemlərin öhdəsindən yalnız birlikdə gələ bilərik. Bu məqsədlə hazırda Bakıda keçirilən “Həmrəy fəaliyyət: yeni və ədalətli dünya üçün Qlobal Cənub QHT-lərinin gücləndirilməsi” Forumu mühüm bir platformaya çevrilib. Biz burada sadəcə müzakirə etmirik, həm də birlikdə həll yolları axtarırıq, əməkdaşlıqlar qururuq və dəyişiklik üçün konkret addımlar atırıq”, - deyə Forum iştirakçısı vurğulayıb.

Fatimə Mərdanlı //EDnews