İqtisadi Əməkdaşlıq Təşkilatının (İƏT) 17-ci sammiti iyulun 3-4-də Azərbaycanın Xankəndi şəhərində uğurla baş tutdu. Bu, Azərbaycanın ev sahibliyi etdiyi ən mühüm beynəlxalq toplantılardan biri kimi tarixə düşdü və ölkənin regional diplomatiyada artan rolunu bir daha nümayiş etdirdi.
EDnews xəbər verir ki, sammitə İƏT-ə üzv dövlətlərin yüksək səviyyəli nümayəndə heyətləri qatılıb. Tədbir çərçivəsində təşkilat daxilində iqtisadi əlaqələrin gücləndirilməsi, regional ticarətin inkişafı və nəqliyyat-logistika əməkdaşlığının genişləndirilməsi kimi vacib məsələlər müzakirə olunub.
Millət vəkili, iqtisadçı Vüqar Bayramov EDnews-a açıqlamasında qeyd edib ki, Azərbaycan İƏT çərçivəsində üzv ölkələrlə əməkdaşlığı sistemli şəkildə dərinləşdirir:
“Nəzərə alsaq ki, İqtisadi Əməkdaşlıq Təşkilatında Azərbaycanın strateji əməkdaşlıq etdiyi ölkələr yer alır, bu sammit həmin əlaqələrin daha da genişlənməsinə zəmin yaratdı. Xankəndidə keçirilən zirvə, bir tərəfdən təşkilat üzvləri arasında münasibətlərin möhkəmlənməsinə, digər tərəfdən isə Azərbaycan diplomatiyasının regionda mövqelərinin güclənməsinə xidmət etdi.”
Deputat əlavə edib ki, Azərbaycanın beynəlxalq tədbirlərə ev sahibliyi etməsi artıq bir ənənəyə çevrilib və bu, ölkənin beynəlxalq nüfuzuna, iqtisadi əlaqələrinə və strateji mövqelərinə müsbət təsir göstərir.
Sammitin Xankəndidə keçirilməsi Qarabağın bərpa prosesinin sürətlənməsi və bölgənin beynəlxalq gündəlikdə mühüm yer tutması baxımından da simvolik əhəmiyyət daşıyır. Bu, həm də Azərbaycanın regionda sülh, əməkdaşlıq və inkişaf gündəliyini təşviq etməkdə qərarlı olduğunu göstərir.
