Bir həftə ərzində Günəş altıncı dəfə 1 milyon kilometrdən böyük ölçüyə malik nəhəng plazma strukturu kosmosa buraxıb. Bu, Günəşin son illərdə müşahidə olunan ən yüksək səviyyəli fəallıqlarından biri kimi qiymətləndirilir.

“EDnews” xəbər verir ki, bu barədə məlumat Rusiya Elmlər Akademiyasının Kosmik Tədqiqatlar İnstitutunun (İKİ RAS) Günəş Astronomiya Laboratoriyasının Telegram kanalında paylaşılıb.

“Günəş kosmosa atdığı qabarıqlıqların (prominensiyalar) ölçüsünə görə yeni rekordlar müəyyənləşdirir. Sonuncu hadisə Moskva vaxtı ilə saat 09:00-14:00 (Bakı vaxtı ilə 10:00-15:00) aralığında qeydə alınıb. Buraxılan plazma strukturu Günəşin şimal qütbü istiqamətində hərəkət edib və uzunluğu bir milyon kilometrdən artıq olub,” – deyə laboratoriyanın məlumatında qeyd olunur.

Alimlərin bildirdiyinə görə, bu emissiyadan təqribən bir gün əvvəl də Günəşin cənub qütbü yaxınlığında eyni ölçülərdə başqa bir plazma strukturu müşahidə edilib. Bu, Günəşin həm şimal, həm də cənub qütblərində paralel və intensiv aktivlik mərhələsinə daxil olduğunu göstərir.

Mütəxəssislər hesab edirlər ki, bu cür plazma buraxılışları Günəşin 11 illik fəallıq dövrünün maksimal fazasına yaxınlaşdığının əlamətidir. Belə hadisələr Yerdə maqnit qasırğalarının yaranmasına, rabitə sistemlərinin pozulmasına və səma hadisələri kimi müşahidə edilə bilən auroralara (şimal işıqları) səbəb ola bilər.

Bu kəşf Günəş müşahidələrinin davam etdirilməsinin, kosmik hava şəraitinə nəzarətin və mümkün risklərin vaxtında proqnozlaşdırılmasının nə qədər önəmli olduğunu bir daha göstərir.