Xəbər verdiyimiz kimi, Çində COVID-19-a rekord – 39.791 yeni yoluxma qeydə alınıb. Yoluxanların maksimum sayı ardıcıl dördüncü gün qeydə alınır.

Virusun bu qədər yayılması Azərbaycan üçün təhlükə sayıla bilərmi?

Ednews bu barədə həkimlərin münasibətini öyrənib.

İnfeksionist Vüqar Cavadzadə açıqlamasında bildirdi ki, virusun Çində artması 2019-20-ci illərdə olan səviyyəyə çata bilməz. Çünki virus zaman keçdikcə mutasiyaya uğrayır.

“Hazırda da öz gücünü azaldıb. Mutasiya edən orqanizmlərin isə xəstəlik törətmək qabilliyyəti getdikcə aşağı düşür. Onlar bir neçə xüsusiyyət qazana bilərlər. O xüsusiyyətlərdən biri də yolxuculuğu nisbətən arta bilər. Amma kliniki əlamətlərin davam etmə müddəti və yaxud da ölüm halları yüksələ bilməz. Çinlə Azərbaycanı müqayisə etməzdim. Çünki orada əhalinin sayı bizdən xeyli çoxdur. İnfeksion xəstəliklərin yayılmasında da əhalinin sıxlığının böyük əhəmiyyəti var. Çində lokal ərazidə virus yayılıb. Ona görə də o qədər narahat olmağa dəyməz. Azərbaycana elə də ciddi təsiri olmayacaq. Bizdə də havalar getdikcə soyuyur. İnfeksionlu, viruslu xəstələrdə nisbətən artım müşahidə edilə bilər. Ola bilər ki, indi yoluxanlar 2 rəqəmlidir, qış aylarında 3 rəqəmli də ola bilər. Koronavirusun tüğyan etdiyi dövr arıtq geridə qalıb və təhlükə yoxdur”.

Həkim Məlahət Hümmətqızı qeyd etdi ki, əvvəlcədən proqnoz vermək çətindi.

“Havalar soyuq keçir, artıq payız fəsli bitir və qışa doğru gedirik. Əhali arasında qrip virusu kəskin yayılıb. Virus  havada hələ də var. Qışda  havaların necə keçəcəyini hələ bimirik. Sərtmi olacaq, küləkli, yağışlı, qarlı olacaq, bilmirik. Viruslar hava, damcı yolu ilə yayılır. Virusun yayılmasında havanın çox böyük rolu var. Soyuq havalarda maska taxmağın tərəfdarıyam. Özüm taxıram. Yenidən virusa yoluxmamaq üçün, soyuq, yağışlı havalarda maska taxmalıyıq. 

M.Hümmətqızı söhbət əsnasında Azərbaycanda hələ də Covid-19 diaqnozlu xəstələr var. Evdə yatan xəstələr arasında Covid-19 diaqnozu aşkar olsa da, əvvəlki kimi ölüm halları  yoxdur. Xəstələr tez bir zamanda sağalıb ayağa qalxırlar. Buna səbəb Respublikamızda əhali arasında aparılan kütləvi vaksinasiyalar, virusun mutasiyaya uğraması və insanlarda immun vəziyyətin güclənməsidir”.

Xatırladaq ki, koronavirus 2019-cu ilin dekabrında Çinin Uhan şəhərində yayılmağa başlayıb. Çin həmin ilin sonunda Ümumdünya Səhiyyə Təşkilatını (ÜST) ölkədə naməlum virusun yayılması barədə məlumatlandırıb. ÜST 2020-ci il fevralın 11-də infeksiyanın adını COVID-19 qoyub, 1 ay sonra - martın 11-də isə koronavirusun yayılmasını pandemiya elan edib.

Oğuz Ayvaz

• Tag:
• Covid-19 yenidən Azərbaycan