Dubay Səhiyyə İdarəsi ilk dəfə olaraq, süni intellektdən istifadə etməklə müalicəvi və cərrahi xidmətlər göstərən, ürək və ağciyər xəstəlikləri üzrə ixtisaslaşmış xəstəxananın fəaliyyətə başladığını elan edib.
Ednews xəbər verir ki, qurumun baş direktoru Avad Əl Ketbi, Dubai Healthcare City-də təxmini dəyəri 450 milyon dirhəm olan Prime Group-a bağlı xəstəxananın açılışını təqdim edib.
Layihə rəhbərləri jurnalistlərə bildiriblər ki, yeni xəstəxana 33,000 kvadratmetr ərazini əhatə edən doqquz mərtəbədən ibarətdir.
XəstəXanaya ixtisaslaşmış robotik cərrahiyyə üsulları, hibrid əməliyyat otaqları və hibrid kateterizasiya laboratoriyaları daxil olacaq.
Əl Ketbi bu layihənin əhəmiyyətini vurğulayaraq, dünya ölkələri üzrə ən son texnologiyalar, sistemlər və ağıllı həllər əsasında ən yaxşı beynəlxalq tibbi protokol və təcrübələrə uyğun olaraq ürək, ağciyər və şişləri olan xəstələr üçün ixtisaslaşmış müalicə imkanları təmin edəcəyini bildirdi.
Rəna Mürşüd
