Myanmanın hərbi rəhbəri Min Aunq Hlainq, ölkəsində minlərlə insanın həyatını itirməsinə və şəhərlərin tamamilə dağılıb viran olmasına səbəb olan zəlzələ fəlakətinin ortasında, regional sammitə qatılmaq üçün Taylandın Bangkok şəhərinə səfər edəcək. Zəlzələnin nəticəsində həlak olanların sayı 3.000-ə çatıb.

Cümə günü Mərkəzi Myanmada baş verən güclü zəlzələnin nəticələri ağır olub. Hərbi hökumətin məlumatına görə, 3,085 nəfər həyatını itirib, 4,715 nəfər isə yaralanıb. Yüzlərlə insan hələ də itkin düşüb,ölənlərin sayının daha da artacağı gözlənilir.

Myanma ordusunun sözçüsü bildirib ki, Min Aunq Hlainq, Bengal Körfəzini əhatə edən yeddi ölkənin liderlərini toplayacaq sammitə qatılmaq üçün cümə axşamı Bangkoka uçacaq. Sammitin cümə günü başlanacağı gözlənilir.

Onun sammitdə iştirakı nadir haldır, çünki sanksiya altındakı liderlər adətən belə tədbirlərdən kənarlaşdırılır.

Sammitə ev sahibliyi edən Tayland, zəlzələnin təsirinin hiss olunduğu və 21 nəfərin həyatını itirdiyi ölkə olaraq, liderlərdən fəlakətə dair birgə bəyanat qəbul etmələrini təklif edib. Birləşmiş Bengal Körfəzi ölkələri olan Banqladeş, Butan, Hindistan, Nepal və Şri Lanka da sammitdə iştirak edəcəklər.

Dünyanın müxtəlif ölkələri, zəlzələdən sonra Myanmaya yardım və xilasetmə komandaları göndəriblər, amma zəif infrastruktur və davam edən vətəndaş müharibəsi bu səyləri çətinləşdirib.

Hərbi rəhbərlik çərşənbə axşamı  bu yardım əməliyyatlarını sürətləndirmək məqsədilə müvəqqəti atəşkəs elan edib, halbuki əvvəlki dövrlərdə silahlı etnik üsyançı qrupların təkliflərini rədd edib.

Bundan əvvəl, hərbi ordu, zəlzələdən ciddi zərər çəkmiş üsyançıların nəzarətindəki ərazilərə hava zərbələri endirməyə davam etmişdi.

Şənbə günü, hərbçilər Çin Qızıl Xaç təşkilatının yardım yüklü avtomobillərinə atəş açmışdı. Həmin nəqliyyat vasitələri humanitar yardım daşıyırdı, lakin hərbi rəhbərlik, avtomobillərin dayanma işarəsinə məhəl qoymadan irəlilədiyini və bu səbəbdən atəş açıldığını bildirdi.

Myanma 2021-ci ildə hərbi rejimin hakimiyyəti ələ keçirməsindən sonra qanlı vətəndaş müharibəsinə sürüklənib. Bu münaqişə, silahlı müqavimətin artmasına və uzun illər boyu hərbi hakimiyyətə qarşı mübarizə aparan etnik qrupların güclənməsinə yol açıb.

Uzun illər davam edən zorakılıqlar, ölkənin iqtisadiyyatını çökdürüb, inflyasiyanı kəskin şəkildə artırıb və nəticədə Myanmarı dərin bir humanitar böhrana sürükləyib.

Zəlzələ, mövcud böhranın təsirini daha da dərinləşdirib. Humanitar təşkilatlar, hərbi rəhbərliyə yardım maneələrini aradan qaldırmağa çağırıblar.

Mədinə Məmmədova\\EDnews