İranın qərbində yerləşən İlam vilayətində tələbələrin yaşadığı yataqxanada baş verən qaz sızması ciddi təhlükəyə səbəb olub. Yerli mənbələrin verdiyi məlumata əsasən, hadisə İlam Universitetinin "Andişə" yataqxanasında qeydə alınıb və nəticədə 17 tələbə qazdan zəhərlənib.

Məsələ ilə bağlı İlam Təcili Yardım və Fövqəladə Halların İdarə Olunması Mərkəzinin rəhbəri Həmid Səfərpur rəsmi açıqlama verib. O bildirib ki, zəhərlənən tələbələrdən 12-si ambulator müalicə alıb, digər 5 nəfər isə əlavə müşahidə və müayinələr üçün İlam şəhərindəki Razi xəstəxanasına yerləşdirilib.

Araşdırmalar zamanı məlum olub ki, hadisəyə yataqxananın qazanxanasında yerləşən qaz məşəlinin sönməsi səbəb olub. Sönmüş məşəldən sızan qaz soyutma sistemləri vasitəsilə otaqlara yayılıb və tələbələrin zəhərlənməsinə səbəb olub.

Həmid Səfərpur onu da əlavə edib ki, hadisədən dərhal sonra universitetin texniki xidmət qrupu qazanxanada təmir işləri aparıb və hazırda heç bir təhlükə olmadığı bildirilir. Təhlükəsizlik tədbirlərinin gücləndirilməsi və analoji halların təkrarlanmaması üçün universitet rəhbərliyinə tövsiyələr verilib.

Universitet rəhbərliyi və yerli səhiyyə qurumları tələbələrin sağlamlıq vəziyyətini diqqətdə saxlayır. Valideynlərə isə hadisə ilə bağlı məlumat verilib və vəziyyətin sabit olduğu bildirilib.

Fatimə Şükürova // EDnews