Bu gün səhər saatlarında dünyanın ən böyük sərnişin təyyarəsi olan “Airbus A380”, London-Sinqapur marşrutu üzrə uçuş zamanı Bakıya məcburi eniş edib. Təyyarə “Qantas Airlines” aviaşirkətinə məxsusdur.

Azərbaycanın beynəlxalq hava limanlarının İctimaiyyətlə Əlaqələr xidmətinin yaydığı məlumata görə, təyyarənin kapitanı Heydər Əliyev Beynəlxalq Aeroportuna təcili eniş üçün müraciət edib. Buna səbəb göyərtədəki sərnişinlərdən birinin səhhətində qəfil pisləşmə olub.

Təyyarə saat 07:55-də Bakı vaxtı ilə uğurla eniş edib. Hava gəmisinə dərhal yerli tibbi heyət daxil olub və xəstə sərnişinə ilkin yardım göstərilib. Hal-hazırda onun vəziyyəti tibbi müşahidə altındadır.

Qeyd edək ki, “Airbus A380” iki göyərtəli və dörd mühərrikli hava gəmisidir. O, yüzlərlə sərnişin daşımaq imkanına malikdir və yalnız texniki baxımdan yüksək standartlara cavab verən hava limanlarında eniş edə bilir. Bakıdakı Heydər Əliyev Beynəlxalq Aeroportu isə bu cür nəhəng təyyarələr üçün tam uyğun infrastruktur və avadanlıqla təchiz olunmuş regionun azsaylı hava limanlarından biridir.

Mütəxəssislərin fikrincə, bu hadisə Azərbaycanın beynəlxalq aviasiya sistemindəki strateji mövqeyini və texniki hazırlığını bir daha təsdiqləyir.

Fatimə Şükürova // EDnews