Hər bir millətin özünə xas tarixi, mədəniyyəti, milli-mənəvi, dini dəyərlərinə söykənən fərqli toy adət-ənənələri var. Elə bu səbəbdən də hər bir xalqın özünəməxsus, maraqlı bəzən təəccübləndirən toy qaydaları mövcuddur.
Mövzunun cəmiyyət arasında geniş maraq doğurduğunu nəzərə alaraq, Ednews oxucuları üçün mütəmadi olaraq dünya toy adət-ənənələri haqqında maraqlı faktları təqdim edəcək.
Ednews “Onlarda toylar” rubrikasını təqdim edir. Bu dəfə Misirdə keçirilən toy adət-ənənələrindən söz açacağıq.
Qeyd etməliyik ki, nikah anlayışı məhz ilk dəfə olaraq Misirdə yaranıb. Nikah müqaviləsi və bununla bağlı bütün məsələlərin vətəni sayılan Misirin, özünə xas toy-adət ənənələri mövcuddur.
Gəlin, bununla daha yaxından tanış olaq..
Onlarda toy...
Misirdə evliliklər İslam dinindən qaynaqlanır, burada Qurana görə, ərin maddi və mənəvi cəhətdən təmin edəcəyi halda, dörd arvad almaq səlahiyyətinə malikdir. Bu səbəbdən, toydan əvvəl bəyin maddiyatının öyrənilməsi vacib məsələdir.
Dini adət-ənənəyə görə, gəlini bəy yox, ailəsi seçir və daha sonra iki tərəfin razılığı əsasında toy hazırlıqlarına başlanılır.
Hər hansı bir anlaşılmazlığı aradan qaldırmaq üçün öncədən ailələr bəyin gəlin üçün mütləq ödəyəcəyi bəxşiş və “mehr pulu”-nun mahiyyəti danışılır.
Ən vacib məsələ isə nikah müqaviləsini imzalanmasıdır. Bu təmtaraqlı şəkildə, qonaq və qohum-əqrəbaların, hətta notariatın iştirakı ilə baş tutur. Nikahda “Zaffa” adlı toy vağzalısı çalınır, daha sonra müğənnilərin ifası və aktyorların alovlu qılınclarla şou- tamaşası göstərilir, rəqqasələr milli rəqsllərini nümayiş etdirirlər. Sonda imzalar atıldıqdan sonra nikaha dair Qurandan ayələr oxunur. Bu da ailənin xoşbəxt və səadət içində yaşaması üçün dini bir ritualdır.
Misirlilər hər kəsdə olduğu kimi nikah üzüklərini sol barmağa taxırlar, çünki onalara görə "sevgi damarı” ürəkdən gəlir.
Nikahdan sonra isə toy mərasiminin açılışı baş tutur.
Mərasimda bəylə gəlin stolu güllərlə bəzədilir. Hətta rəqs zamanı onları bəzədilmiş oturacaqlarda oturdub göyə qaldıraraq, şənliyi daha da maraqlı hala çevirirlər.
Misir toylarında əsas şənliyin təmtəraqlı, maraqlı, möhtəşəm və unudulmaz keçməsinə önəm verirlər. Xanımlar bəzən bəylərlə yox, ayrılıqda toplaşaraq rəqs edirlər. Toyda sadəcə müğənnilər yox, aktyorların iştirakı ilə maraqlı toy tamaşaları nümayiş etdirirlər.
Mütləq sayılan təamlardan - quzu əti ilə müxtəlif ədava və çərəzlərlə zəngin “mak-lyubə” plovu və bal və yağla bişirilmiş məşhur “bintas-səhn” şirniyyatı toy mərasimlərinin baş tacıdır. Həmçinin, çoxlu və müxtəlif sayda ədavalardan, nanə, mixək, darçın və qırmızı bibərdən hazırlanan toy şorbası bütün qonaqlara paylanılır. Misirlilərə görə bu şorba yeni evlənənlərin nəslinin artması üçün onlara verilən bir nemətdir.
Lakin, yuxarıda da qeyd etdiyim kimi Misir toylarında əsas önəm yeməklərə yox, toyun daha maraqlı, təmtaraqlı keçməsinə verilir. Çünki maraqlı tamaşası və can-fəşanlıqla keçirilən toy mərasimində qonaqlara sadə şirniyyat və çörək arası atışdırmalıq da verilə bilər.
Rəna Mürşüd
