Hər bir millətin özünə xas tarixi, mədəniyyəti, milli-mənəvi, dini dəyərlərinə söykənən fərqli toy adət-ənənələri var. Elə bu səbəbdən də hər bir xalqın özünəməxsus, maraqlı bəzən təəccübləndirən toy qaydaları mövcuddur.
Mövzunun cəmiyyət arasında geniş maraq doğurduğunu nəzərə alaraq, Ednews oxucuları üçün mütəmadi olaraq dünya toy adət-ənənələri haqqında maraqlı faktları təqdim edəcək.
Ednews “Onlarda toylar” rubrikasını təqdim edir.
Hər ölkənin özünəməxsus toy adətləri olduğu kimi, Vyetnam xalqının da həyatında bu ritual ən vacib hadisələrdən sayılır. Son illərdə gənclərin kifayət qədər avropalaşmasına baxmayaraq, vyetnamlılar müasir dövrdə də köhnə toy ənənələrini müqəddəs şəkildə qorumağa davam edir. Əlbəttə ki, hər yerdə olduğu kimi, bu ölkənin də bir istisnası var: 20-ci əsrdə vyetnamlılar erkən evlənsələr də, hazırda belə hallar baş vermir. Keçmişdə cavanlar üçün həyat yoldaşları nəslin böyükləri tərəfindən seçilirdisə, müasir Vyetnamda gənclər ailə həyatını öz seçimi ilə edir.
Hər ölkədə mövcud olan evlilik mərasimləri - nişan və toy Vyetnamda özünəməxsus şəkildə keçirilir. Həm də bəzi adətlər, ölkə daxilində olan müxtəlif millətlər arasında dəyişir.
Le anxoy (Lễ Ǎn Hỏi) nişan mərasimi...
Mərasimdən öncə bəyin ailəsi gəlinin evinə yuvarlaq laklı qutulardan ibarət toy hədiyyələti göndərir. Bu qutular əsasən cüt yox, tək sayda olmalıdır. Hədiyyələrin arasında mütləq şəkildə çəhrayı təbaşir, areka qozu, betel yarpaqları yer alır. Bu hədiyyələr Vyetnam toylarının əvəzolunmaz atributlarından sayılır.
Vyetnamda Çəhrayı təbaşir xoşbəxtliyin simvolu sayılır. Həmçinin, hədiyyələr arasında çay, şirniyyat, meyvə, şərab, digər dadlı məzələr, hətta pul da olur. Bəy tərəfindən olan subay xanımlar və bəylər isə qız tərəfinin ailə üzvlərinə qırmızı parça ilə örtülmüş hədiyyələr bağışlayırlar.
Bundan başqa nişan mərasimində mütləq toy tarixi təyin olunur.
Le kyoy (Lễ Cưới) toy mərasimi...
Toyda bəyin ailəsi gəlinin atasının razılığını almaq üçün qız evinə rəsmi və təntənəli şəkildə gəlir. Vyetnamda toydan əvvəlki son gecə çox vacibdir. O günü gəlinin anası qızının saçını bir neçə daraqla darayır. Hər darağın isə öz mənası var. Ən önəmlisi isə üçüncüsüdür. Gəlinin saçlarını darayaraq ana qızı üçün xoşbəxt gələcək arzulayır.
Əlbəttə ki, toy mərasimi çoxlu qonaq və ləziz təamlar olmadan keçməz. Ən vacib məqamlardan biri isə gəlinlə bəyin məbədgahın qarşısında dua edib əcdadlarından evlənmək üçün icazə istəmələridir.
Mərasimin sonunda bəy, gözəl izdivac üçün gəlinin ailəsinə təşəkkür edir. Bununla da toy mərasimi başa çatır.
Rəna Mürşüd