Türkiyənin göz bəbəyi İstanbul.. Tarixi keçmişi ilə eləcə də müasir infrastrukturu ilə bütün dünyanı özünə cəlb edən bu əsrarəngiz şəhər turistlərin əvəzolunmazı hesab edilir.
Hər il milyonlarla müxtəlif ölkədən olan turistləri qonaq edən bu şəhər qeyri-adi, tarix qoxuyan məkanlarla turizmin əsas şəhəri olaraq adından söz etdirməyi bacarıb.
Ednews olaraq bu dəfə İstanbulun “Üzən Muzey” adlandırılan tarixi sərnişin gəmisindən söhbət açacağıq. Səyahətimiz zamanı gəminin qeyri-adi görünüşü və orada göstərilən xidmətlərlə tanış olduq.
Nəqliyyat vasitəsi haqda məlumat verən gəmi kapitanı bildirdi ki, 1976-cı ildə inşa edilən və şəhid Adəm Yavuzun adı verilən gəmi o illərdə İstanbul daxili sərnişin daşınmasına xidmət edib.
2013-cü ildə fəaliyyətinə son qoyulan gəmi 7 illik fasilədən sonra – 2020-ci ildə yeni konsepti və dizaynı ilə yerli və əcnəbi insanların istifadəsinə verilib. Gəmi köhnə adından da istifadə edilməklə artıq “Le vapeur Magique”(Le Vapur Magi) ismi ilə İstanbul boğazına seyrə çıxır. Gün ərzində 3 tur təşkil edilən bu tarixi nəqliyyat vasitəsi İstanbulun Eminönü və Ortaköy səmtlərindən start götürür.
Gəmidə restoran, konfrans zalı, xoş günləri qeyd etmək üçün geniş banket zalı fəaliyyət göstərir. Müştəriləri səhər yeməyi zamanı milli türk mətbəxinin ləziz təamlarından zövq alarkən onları dünyaca məşhur İstanbul boğazı müşayiət edir. Bununla yanaşı axşam səyahətləri də təşkil edilir ki, bu zaman da qonaqlara şam yeməyi təklif olunur. Gəmi kapitanının sözlərinə görə müştəri sıxlığını nəzərə alaraq canlı müsiqinin müşayiəti ilə ləziz təamlardan dadmaq üçün öncədən rezervasiya mütləqdir.
Yeni dizaynlı bu tarixi məkanda həmçinin tanınmış rəssamların dünyaca məşhur əsərlərinin 3D formatda sərgisi nümayiş etdirilir. Bu miniatür muzeydə qonaqlar şəkil çəkdirməklə yanaşı, özlərini həmin əsərlərin içində, qəhrəmanların arasında hiss edirlər.
Bundan əlavə gəmidə dron çəkilişi xidməti göstərilir. Bu isə öz növbəsində İstanbulun sehirli mənzərəsi fonunda qonaqlara səyahətlərini ölümsüzləşdirmək imkanı verir.
Hər divarı tarix qoxuyan gəmiylə səyahət etməklə elə ilk dəfədən Türk mətbəxi və musiqisinin aşiqinə çevrilməmək, muzey sayəsində yerli və əcnəbi mədəniyyətin ağuşuna düşməmək mümkün deyil.
İstanbula gəlməyi planlaşdırırsınızsa, bu əsrarəngiz gəmiylə boğaz seyrinə çıxmağı, türk mətbəxinin ləziz təamlarından dadmağı mütləq səyahət cədvəlinizə daxil edin.
Gəmi turumuzdan çəkilən fotoları təqdim edirik:
Vüsalə Balayeva
.jpeg)
