Avstraliyanın Kertin Universitetinin astronomları nadir enerjili partlayış qeydə alıblar. Bu partlayışın mənbəyi NASA-ya məxsus, artıq 50 ildən çoxdur fəaliyyətsiz olan Relay 2 peyki olub. 1964-cü ildə orbitə buraxılan və 1967-ci ildə istismardan çıxarılan bu aparat qəfil olaraq milyardda bir saniyəlik enerjili impulsla "canlanıb".
“EDnews” xəbər verir ki, əvvəlcə tədqiqatçılar bu enerjili siqnalın bir pulsardan və ya naməlum kosmik cisimdən gəldiyini düşünüblər. Analizlər göstərib ki, partlayış Yerdən cəmi 4500 km məsafədə baş verib. Bu isə onun Yer ətrafında dövr edən bir peykdən qaynaqlandığını təsdiqləyib.
Ətraflı araşdırmadan sonra siqnalın mənbəyi kimi Relay 2 müəyyən edilib. Alimlərin fikrincə, bunun səbəbi mikrometeoridin və ya kosmik tullantıların yaratdığı toqquşma nəticəsində baş verən elektrostatik və ya plazmatik boşalma ola bilər:
"Mikrometeoridlə toqquşmadan sonra baş verən elektrostatik və ya plazmatik boşalma partlayış üçün inandırıcı izahdır", deyə araşdırmada qeyd edilir.
Necə mümkün oldu?
Kosmik aparatların səthi illər ərzində kosmosdakı plazma ilə qarşılıqlı təsirdə olaraq elektron yüklərlə dolur. Bu yüklər müəyyən həddə çatdıqda, kosmik gəminin səthindəki müxtəlif materiallar arasında qəfil boşalma baş verə bilər. Bu hadisədə qeydə alınan impuls son dərəcə qısa — cəmi milyardda bir saniyə olsa da, onun gücü gecə səmasında digər siqnalları kölgədə qoyub.
Hadisənin əhəmiyyəti
Bu hadisə peyklərin təhlükəsizliyi və kosmosun monitorinqi üçün texnologiyaların yenilənməsi zərurətini gündəmə gətirib. Tədqiqatçılar ehtimal edirlər ki, bu kimi hadisələr kosmosda daha çox baş verir, lakin indiyə qədər onları qeydə almağa imkan verən texnologiyalar mövcud deyildi:
"Biz düşünürük ki, bu partlayış elektrostatik boşalma və ya mikrometeoridin toqquşması nəticəsində baş verib və bu cür hadisələr nisbətən geniş yayılmış ola bilər", deyə alimlər bildiriblər.
