Avropa İttifaqının Azərbaycandakı nümayəndəsi Kestutis Yankauskas Avropa nümayəndəliyinin Azərbaycanın regionlarındakı fəaliyyəti barədə Eurasia Diary-ə müsahibə verib.
Səfir qeyd edib ki, o Azərbaycana gəldikdən həmən sonra Aİ-nın Şəkidə təşkil etdiyi bir sıra tədbirlərdə iştirak edib. Onun sözlərinə görə, tədbirdə çox sayda mehriban və həvəsli insanlar görüb. İnsanlar məmnunluq hissi ilə milli mətbəx, təhsil proqramı və turizm də daxil omaqla Avropa İttifaqının bütün dövlətləri barədə məlumatın verildiyi çadırlara baş çəkirdi. Kestutis Yankauskas keçən il Aİ-nin nümayəndəliyi tərəfindən keçirilən ictimai sorğu barədə danışıb.
“Biz gördük ki, keçən il 2016-cı illə müqayisədə Azərbaycanda Aİ haqqında məlumatı olanların və ona müsbət yanaşan insanların sayı ikiqat artmışdır. Bununla yanaşı sorğuda iştirak edənlərin 20%-nin Avropa İttifaqı barədə məlumatı yox idi. Bunun üzərində çalışmalıyıq. Biz Azərbaycanda mədəni və maarifləndirici tədbirləri davamlı olaraq keçirməliyik. İnsanlara sadəcə olaraq, Aİ və bizim Azərbaycanla hazırda kifayət qədər dinamik inkişaf edən əməkdaşlığımız haqqında məlumat verməliyik”, deyə cənab Yankauskas bildirib.
Gələcəkdə ölkədə həyata keçiriləcək layihələrə gəldikdə isə, səfir Azərbaycan Respublikasının yaranmasının 100 illiyini xüsusi qeyd edib. Məlum olduğu kimi, 1918-ci ildə Azərbaycan müsəlman aləmində qadınlara səsvermə hüququnun verildiyi, opera və baletin təqdim olunduğu ilk respublika olub. Səfir bu dəyərlərin Avropa dəyərləri ilə oxşar olduğunu vurğulayıb.
Kestutis Yankauskas may ayında respublikanın rayonlarından birində Avropa Gününün qeyd olunacağını deyib. Onun sözlərinə görə, bununla yanaşı, oktyabrda keçirilən və Avropa və Azərbaycan dəyərlərinə yaxın dəyərləri: tolerantlıq və multikulturalizmi yayan "Imagine Euro Tolerance Festival" kino festivalının da növbəti illərdə davam etdiriləcəyinin planlaşdırıldığını qeyd edib.
Aİ-nin Azərbaycanın regionlarındakı fəaliyyəti mövzusunda danışan Yankauskas Lənkəran şəhəri ilə kənd təsərrüfatı sahəsində əlaqələrin inkişafına dair planlara toxunub. O eləcə də, Bərdədə peşə təhsilinin inkişaf etdirilməsi üzrə artıq mövcud olan layihəni xatırladıb. Müsahibənin sonunda səfir Aİ nümayəndələrinin Azərbaycana səfər edəcəkləri və daha çox regionlarda layihələr həyata keçiriləcəyi ilə bağlı əminliyini ifadə edib.
Natalya Quliyeva
