"Yəqin, Əli Kərimlinin mənim dostlarımla əlində ov tüfəngi çəkdirdiyi şəkil çoxları kimi Sizi də çaşdırıb. O nəinki döyüşməyib, heç əlindəki silahla boş butulkaya da atəş açmayıb". 

Eurasia Diary xəbər verir ki, bunu "lent.az"a müsahibəsində Bütöv Azərbaycan Xalq Cəbhəsi Partiyasının sədri, millət vəkili Qüdrət Həsənquliyev AXCP sədri Əli Kərimlinin həqiqətəndə Qarabağda döyüşüb-döyüşmədiyi barədə sualı cavablandırarkən deyib. 

"Həmin vaxt biz BDU-da qərara aldıq ki, tələbələr Laçına özünü müdafiə dəstələrinə köməyə getsin. Həmin vaxt ciddi döyüşlər getmirdi, sadəcə kəndin kənarında müşahidə postlarında dayanmalı idik. Universitet rəhbərliyinin də təşkilatçılığı ilə iki qrup yaradılması barədə qərar qəbul olundu. Çox dərs buraxılmaması üçün qruplar növbə ilə bir-birini əvəz etməli idi. Birinci qrup gedəndən bir müddət sonra Əli Kərimli komsomol təşkilat katibi kimi rektor tərəfindən onlara baş çəkmək üçün göndərildi və o da gedib həmin şəkili çəkdirib qayıtdı. O həmişə deyəndə ki, mən vuruşmağa getmişdim, mən dəhşətə gəlirəm.100-dən artıq adamın bildiyi bir hadisə haqqında utanmadan necə ağ yalan danışmaq olar?!"

Q.Həsənquliyev həmin dəstənin tərkibində olmadığını da qeyd edib.

"Yox, o vaxt biz Bakıda yerləşən universitetlərin tələbələrini əhatə edən Şimali Azərbaycan Azad Tələbə İttifaqının yaradılması üçün qurultay keçirmək ərəfəsində idik. Təşkilat Komitəsində əldə olunan ilkin razılığa əsasən, sədrliyə mənim namizədliyim irəli sürüləcəkdi və təşkilati işlərlə daha çox mən məşğul idim. Ona görə də mən ikinci qrupun tərkibində getməli idim. Amma sonra tələbələrin gedişi qadağan olundu", - deyə deputat bildirib.

• Tag:
• Qüdrət Həsənquliyev
• Əli Kərimli