Qarabağda döyüşən mayorumuz üsyan etdi - Qasım Süleymani Azərbaycan üçün nə edib?! | Eurasia Diary - ednews.net

22 Fevral, Şənbə


Qarabağda döyüşən mayorumuz üsyan etdi - Qasım Süleymani Azərbaycan üçün nə edib?!

Müsahibə A- A A+

İranın nüfuzlu generallarından biri olan Qasim Süleymani ABŞ tərəfindən öldürülməsi Azərbaycanda da böyük rezonans doğurub. Vətəndaşların bir qismi sosial şəbəkələrdə Süleymani haqqında tərif dolu yazılar yazıb, onun şəkillərini paylaşıb və ABŞ ordusunu lənətləyib. Digər qisimdən olan həmvətənlərimiz isə tam əksinə, bu şəxsin Azərbaycan üçün heç bir müsbət iş görmədiyinə işarə edərək onun şəxsiyyətinin ucaldılmasına etiraz ediblər.

Süleymaninin ölümünə vətəndaşların bir qisminin verdiyi reaksiya Qarabağ döyüşülərinin iştirakçısı, ehtiyyatda olan mayor, Qasim Yüsifovu qıcıqlandırıb. Qasim Yusifov öz həyat hekayəsini Eurasia Diary oxucularına danışıb:

Görüntünün olası içeriği: 1 kişi, ayakta, okyanus, gökyüzü, açık hava, su ve doğa

"Qasım Süleymanini milli qəhrəman zirvəsinə qaldıran azərbaycanlılardan soruşmaq istərdim, görəsən bu İran generalı Azərbaycan üçün nə edib?

Siz məni, Yusifov Qasım Cahangir oğlunu tanıyırsız?
Mən iki körpə qızını həyat yoldaşının ümidinə qoyaraq könüllü olaraq cəbhəyə yollanan Qasiməm, iranlı yox, əsl azərbaycanlı Qasim.

Həmin vaxt mən Qaradağ Sement zavodunda mühəndis işləyirdim. Lakin erməni yaraqlılarının xalqımıza qarşı zorakılığı, döyüşdə şəhid olan mərd qardaşlarımızın qanı, itirdiyimiz cənnətdən gözəl torpaqlar məni hər şeyi atıb cəbhəyə yollanmağa vadar etdi.

1991 ci ildə, Milli Ordumuza yazıldım. Sonra aralıqsız döyüşlər, hücumlar, müdafiələr... . Kəlbəcərdə, Laçında, Ağdamda, Fizulidə, Tərtərdə girmədiyimiz məntəqə, döyüşmədiyimiz səngər qalmamışdı...


Müharibə dövründə mənə ən təsir edən məqamlardan biri eynən bizim kimi şiə-müsəlman ölkəsi olan İranın ermənilərə dəstək verməsi idi. İndiyədək yadımdadır ki, döyüşlər zamanı ermənilərdən aldığımız  səngərlər İran istehsalı olan konservlərlə və spirallı geyim paltarları ilə dolu idi. Halbuki, biz nəyinki qida, geyim, heç atmağa güllə tapmırdıq. İranlılarsa ermənilərə müxtəlif döyüş ləvazimatları, qida və s. satmaqla varlanırdılar. Biz qan tökürdük, vətən uğrunda vuruşurduq, amma onlar sadəcə varlanırdılar...
 

Ona görə də mən müharibədə məğlubiyyətimizin əsas səbəblərindən biri kimi sapı özümüzdən olanların xəyanətindən savayı Rusiya və İranın erməniləri dəstəkləməsini görürəm.

Yenidən qayıdıram əvvələ. Mən Azərbaycanımızın bütövlüyü uğrunda döyüşən zabitəm, mayoram. Məni tanımırsınız, ya da tanımaq istəmirsiniz.

Mən, 701 nömrəli hərbi hissədə Artilleriyanın Rabitə Rəisi və Tank Əleyhinə Divizyonun komandiri kimi vəzifələrdə xidmət etmişəm, sona qədər torpaqlarımız uğrunda döyüşmüşəm. Amma bu vaxta qədər uğruna vuruşduğum, yaralandığım, iki balamı, ailəmi tək qoyduğum xalq məni bir dəfə də olsun yadına salmayıb, tanımayıb, bilməyib. Məsələ tanınmaq da deyil, biz zabitik və ictimaiyyətə qapalı həyat yaşamışıq. Ona görə də xalqın bizi tanımaması normal haldır. Lakin məni bu gün qəzəbləndirən şey odur ki, mən və mənim timsalımda Qarabağda can qoymuş minlərlə veteranın, qazinin diqqətsiz qaldığı bir ölkədə hansısa İran generalı az qala milli qəhrəman elan edilir, şəhid adlandırılır.

Məni, mənim kimi vətəniniz, ailəniz, ana-atanız, namusunuz, yolunda canla-başla vuruşmuş, qazi olmuş adamları tanımadan, bilmədən, Qasim Süleymani kimi başqa bir dövlətin zabitlərini qəhrəman elan edirsiz eləmi?! Hayıf, çox hayıf..."

Nicat İSMAYILOV

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan


Загрузка...