Eurasia Diary politoloq və jurnalist Malik Əyyub Sumbal ilə müsahibəni təqdim edir.
- Malik, bir neçə gün öncə mətbuatda indi üzərində səylə çalışdığınız «Tovuz to Karabakh» (Tovuzdan Qarabağa) kitabı ilə bağlı xəbər yayılmışdı. Anladığım qədər, bu kitab Qarabağ münaqişəsindən - Azərbaycanla Ermənistan arasındakı müharibədən bəhs edir. Kitab barədə sizin özünüzdən eşitmək istərdim.
Malik Sumbal: Əslində bu kitab üzərində 2015-ci ildən işləməyə başlamışam. O vaxt artıq ölkənin demək olar ki, bütün bölgələrini gəzmişdim: Tərtər, Bərdə, Gəncə, Füzuli və s.
Hətta erməni təcavüzünün izlərinin açıq-aşkar göründüyü sərhəd bölgələrinə də səfər etmişdim. Mən jurnalistəm axı, buna görə baş verənləri çox yaxından izləyirdim. Bir az sonra qərara gəldim ki, Azərbaycanda olarkən apardığım qeydlər əsasında bu barədə bir kitab yazım. Mən gözlərimlə gördüyüm həqiqəti bütün dünyaya danışmağı çox istəyirdim. Dünya Azərbaycan və Azərbaycan xalqı haqqında həqiqətləri bilməlidir, bu ölkənin necə qurulduğunu, həyat tərzini bilməlidir. Müəyyən bir vaxtda bir neçə layihəyə cəlb olundum, kitabın yazılmasını təxirə saldım. Ancaq keçən ilin məlum hadisələrindən sonra onu bitirib çap etdirmək qərarına gəldim. Bir daha təkrar edirəm ki, insanlar həqiqəti bilməlidirlər. Azərbaycan çox uzun müddət səbirlə torpaqlarının qaytarılmasını gözlədi və hədəfinə doğru irəlilədi.
Kitabımla bağlı bir maraqlı faktı da qeyd etmək istərdim, mən yalnız münaqişə haqqında yazmağa, qaçqın problemini vurğulamağa çalışmadım. Ölkənin zəngin mədəniyyətini göstərmək, iqtisadiyyatı və inkişafından yazmaq mənim üçün vacib idi. Bu kitabda çox şey var. Ümid edirəm iki aydan sonra işıq üzü görəcək.
Azərbaycan çox darıxdığım heyrətamiz bir ölkədir. Azərbaycan xalqı çox tolerant, qonaqpərvər, diqqətlidir, insanlar arasındakı münasibətlər ahəngdardır.
Bir ölkə haqqında daha çox bilmək istəyirsinizsə, həmişə təfərrüatlara diqqət yetirin.
Müsahibəni aldı: Cəmilə Çebotareva
Tərcümə: Gülnar Səlimova