Noyabrın 6-da qondarma Cənubi Osetiya ərazisi yaxınlığında mülki əhaliyə hücumu nəticəsində bir nəfər ölüb, bir nəfər isə qaçırılıb. Gürcüstan KİV-i noyabrın 7-də bildirib ki, hökumət rəsmiləri hadisəyə müxtəlif reaksiyalar verib.

Gürcüstanın baş naziri İrakli Qaribaşvili hücumu pisləyib və bunu Rusiyanın işğalçı qüvvələri tərəfindən törədilən qətl kimi səciyyələndirib.  Aİ-nin Gürcüstandakı Monitorinq Missiyası (EUMM) Cənubi Osetiya İnzibati Sərhəd Xəttində Gürcüstan vətəndaşının faciəvi şəkildə həyatını itirməsi ilə nəticələnən insident baş verdiyini təsdiq edir.

Məsələ ilə bağlı rusiyalı politoloq Sergey Stankeviç, hadisənin dəqiq araşdırılmalı və Gürcüstan ilə Rusiya arasında münasibətlərin gərginləşməməli olduğunu vurğulayıb: 

“İşğal xətti yaxınlığında mülki şəxslərin həbsi normal haldır.

Bununla belə, bu, 2008-ci il müharibəsindən sonra baş verən ilk qətl hadisəsidir. İki gürcü avtomobili ilə Cənubi Osetiya ərazisinə daxil olub. Onlar kilsəyə doğru hərəkət edib və sərhədçilərin əmrlərinə qulaq asmayıblar.

İki nəfərin sərxoş və aqressiv olduğu və sərhədçilərin özlərini müdafiə etmək üçün onlara atəş açdığı məlum olub.

Düşünürəm ki, burada şişirdilməli bir mövzu yoxdur. Gürcüstanda baş verən  sərhəd hadisəsi diqqətlə araşdırılmalıdır. Əsas məsələ hər iki ölkənin iştirakı ilə məlum iş üzərində monitorinq aparılmalıdır.

Gürcüstan prezidenti və Qaribaşvilinin siyasi rəqibi Salome Zurabişvilinin Twitter hesabında bunu “Gürcüstan dövlətçiliyinə açıq hücum” kimi qiymətləndirməsi doğru deyil”.

Politoloq əlavə olaraq bildirib ki, Rusiya-Gürcüstan münasibətləri hazırkı halda stabildir: 

“Dəqiq araşdırıldığı halda bu gözlənilməz hadisə  Rusiya-Gürcüstan münasibətlərinə mənfi təsir etməyəcək.

Ümumiyyətlə, hazırda Gürcüstanla Rusiya arasında münasibətlər stabilləşmə vəziyyətindədir. İndi Tbilisi və Moskva üçün əsas odur ki, heçnəyi suni şəkildə pisləşdirməsinlər.

Hesab edirəm ki, həmçinin  Moskva ilə Kiyev arasında hərbi münaqişə bitdikdən sonra  diplomatiya ilə bağlı onları fundamental nizamlanma gözləyir.

Bu zaman sülh barəsində danışa bilərik”. 

Xəyal Ramiz