Bu il ərzində Ermənistan baş naziri Nikol Paşinyanın Ukraynaya səfəri baş tutdu. Prezidentlə görüşdən sonra hər iki ölkə bir – birilərinə olan münasibətin olduqca yaxşı olduğunu söylədi, daha sonra əlbəttə ki, bu Rusiya tərəfindən elə də yaxşı qarşılanmadı və.s. Hətta 15 dekabr tarixində Moskvada, Rusiya – Ermənistan ictimai forumu keçirildi. Forumda 10 minə yaxın erməni hərbçisinin Ukraynaya qarşı döyüşməyə göndərildiyi söylənilib.
Bəs bu cür ikili standarlar çərçivəsində Ukrayna rəhbərliyi bunu necə qarşılayır?
Ednews – a özəl açıqlamasında Ukrayna Ali Radasının deputatı Aleksandr Merejko, Ermənistanın bu cür ikili standartların qəbul edilməz olduğunu söyləyib.
“Ermənistan hazırda müəyyən səviyyədə Rusiyadan uzaqlaşmağa çalışır. Bu cəhətdən Ukraynaya yaxınlaşması nəzdində simvolik siyasi jestlər edir. Lakin burada bir şeyi başa düşmək lazımdır. “The Economist” nəşrində “Putinin dostları” adı altında paylaşılmış bir məqaləyə sitat gətirmək istəyirəm. Belə ki, orada Rusiyanın Qərbin sanksiyalarından bir növ qoruyan, ona dəstək göstərən ölkələrin siyahısı göstərilib. Siyahının ən yuxarısında isə Ermənistan qeyd edilib. Əlbəttə özünü müəyyən səviyyədə Rusiyadan uzaqlaşdırıb, Ukrayna tərəfinə jestlər edilməsi bizim tərəfimizdən yaxşı qarşılanır. Lakin Rusiyanı Qərbin tətbiq etdiyi sanksiyalardan yayına bilməsi üçün əməkdaşlıq etməsi bizim üçün qəbul edilməzdir. Digər məqam ondan ibarətdir ki, biz Ermənistanın iqtisadi, hərbi və siyasi cəhətdən Rusiyadan aslı olduğunun fərqindəyik. Həmçinin Ermənistan faktiki olaraq KTMT – nin (Kollektiv Təhlükəsizlik Müqaviləsi Təşkilatı) üzvüdür. Bu da o deməkdir ki, Ermənistan bizim düşmənimizin dostudur. Belə şəraitdə Ukrayna buna göz yuma bilməz”.
Deputat Ermənistanla müqayisədə Azərbaycanın Ukraynaya olan dəstəyini daha yüksək qiymətləndirib:
“Nəticə etibarilə Ukrayna dövləti nəyin harda və necə olduğunu görür. Ermənistan diplomatik jestlərdən savayı daha fundamental bir mövqe sərgiləməlidir. Azərbaycan nümunəsi buna bir misaldır. Məsələn, Azərbaycan da Rusiya ilə münasibətlərinə rəğmən bizə humanitar yardımlar göndərir. Yalnız dövlət səviyyəsində deyil, həm də xalqın da Ukrayna dövlətinə olan sevgisini görürük. Azərbaycan xalqı bizi başa düşə bilir. Nəyin müharibə, nəyin soyqırım olduğunu görür. Ermənistanda isə bunlar tamamilə əksinədir. Ona görə də artıq qərar onlarındır. Günün sonunda, hansı ölkənin necə xatırlanacağını isə zaman göstərəcək”.
Əkbər
