Artıq hər birimizin bildiyi kimi Azərbaycanda iqlim məsələlərinin müzakirəsi naminə 2024 – cü ilin noyabr ayında “COP29” tədbiri keçiriləcək. Verilən məlumatlara əsasən Bakı şəhərinə 70 mindən çox qonağın gəlməsi gözlənilir.
Bəs Azərbaycan infrastrukturu bu tədbirin keçirilməsinə hazırdırmı?
İqtisadçı ekspert Natiq Cəfərli Ednews – a açıqlamasında qonaqların qalacağı yerlərin az olmasının problem yarada biləcəyinə toxunub:
“COP29” tədbiri doğrudan dünyada marağa səbəb olan və maraqla izlənən tədbirlərdən biridir. Təqribən Bakıya 100 minə yaxın qonağın gəlməsi gözlənilir. Təbii ki, bu da Bakının infrastrukturuna çox böyük bir yük gətirəcək. Tək elə Bakı şəhərində otellərdə 10 minə yaxın yataq yeri var. Əsasən də burada söhbət orta və yüksək dərəcəli otellərdən gedir. Bu qədər qonağın qalacağı qədər tutum düşünürəm ki, yoxdur. Eyni məsələ nəqliyyat infrastrukturuna da aid edilə bilər. Biz dəfələrlə Bakıda böyük tədbirlər olduqda şəhər mərkəzinin bağlı olmasının, tıxacların şahidi olmuşuq. Lakin sözsüz ki, zaman da var. Bu Azərbaycan hökümətinin qarşısında ciddi bir çağırış və öhdəlikdir. Bunun həlli üçün xüsusilə marşrutların təşkili, yeni yol və zolaqların təşkili və.s. Avropa Oyunları zamanı müəyyən bir təcrübəyə sahib olduğumuz üçün bu həlli mümkün bir problemdir. Burada əsas maneə kimi qonaqların qalacağı yerlə bağlıdır. Çox güman ki, əhalinin özü üçün də müəyyən bir fürsət açılır. Beynəlxalq ev kirayələmək saytları mövcuddur. İndidən məsləhət görərdim ki, kimin imkanı, boş evi varsa noyabr ayının ortalarından, dekabrın əvvəllərinə qədər kirayə verə bilərlər. Buna əsasən də növbəti il vətəndaşlar öz məzuniyyətlərini bu tədbirin əsasında təşkil etsələr daha yaxşı olar. Hərçənd nəticə etibarı ilə ölkəyə gətirəcəyi fürsətlərin çox olması ilə birlikdə, əhaliyə çətinlik yaranmaması naminə qızıl balansı da tapmaq mütləqdir”.
Azərbaycan Milli Məclis deputatı Vahid Əhmədov isə tədbirin əhəmiyyəti ilə savayı ölkədə bu tədbirin keçirilməsi üçün bütün şəraitin mövcud olduğunu söyləyib:
“Bu cür böyük miqyaslı tədbirlər Azərbaycanda yetərincə keçirilib. Məsələn hətta Azərbaycan lehinə səs verən ölkələr arasında Ermənistan da var idi. Ona görə ki, tədbirin keçirilməsi üçün ölkəmizdə istənilən şərait var. Təhlükəsizlik məsələlərinin həll olunması, turist xidmətləri və otellərin mövcudluğu yetərincədir. Bu sadaladığım məsələlərin olması durur bu cür tədbirlərin keçirilməsində. Tədbir əsnasında mövcud bir sıra əlaqələrin inkişafı naminə də müəyyən töhfələr verilə bilər. Azərbaycan üçün bu tədbirin keçirilməsi əhəmiyyətlidir və ölkəmiz buna hazırdır”.
Əkbər Novruz