Rusiya xarici işlər nazirinin müavini Mixail Qaluzin bildirib ki, KTMT çərçivəsində qalmaq ilk növbədə Ermənistan xalqının və dövlətinin maraqlarına cavab verir. Bundan əlavə, KTMT-yə üzv ölkələr həmişə İrəvana yardım göstərməyə hazır olublar və indi də göstərməkdə davam edirlər. Ermənistan hökümətinin Rusiya qarşı qərəzli mövqeyi, Qərblə bağlı güclü əməkdaşlığı Rusiyanı dərindən narahat etsə də faktiki fəaliyyəti olmayıb. Niyə Rusiya Ermənistana güzəştə gedir?
Mövzu ilə bağlı politoloq Zərdüşt Əlizadə Ednews-a açıqlaması zamanı bildirib ki, beynəlxalq münasibətlər mürəkkib bir sahədir və heçnə olduğu kimi deyil:
“Sadəcə media tərəfdən görünən proseslərlə siyasəti analiz etmək doğru deyil. Sizcə, Ukrayna və Rusiya gizli şəkildə görüşüb, nəyisə müzakirə etmirlər? Əlbəttə edirlər. Ermənistan - Rusiya məsələsinə gəldikdə, Ermənistan 30 ildən artıqdır ki, de-fakto olaraq Rusiyanın ön istehkamıdır. Ermənistan Rusiyanın bölgədəki bütün maraqlarını tamamilə təmin edir. Artıq dövlət müstəqilliyini yavaş-yavaş itirirdi. Eyni zamanda ölkədə yaxşılığa doğru heçnə dəyişmirdi. Ölkəyə “Qarmaq” mafiyası rəhbərlik edirdi. Onlar da demək olar ki, Rusiya casusları idi. Erməni xalqı gördü ki, bu istiqamətdə davam etsələr bunun gələcəyi yoxdur. Ona görə də onlar Paşinyanı hakimiyyətə gətirdilər. Paşinyandan sonra Ermənistan Qərblə münasibətləri normallaşdırdı. Bu isə Rusiyanın xoşuna gəlmədi. Rusiyadan bununla bağlı kiçik həcmli etiraz notaları olsa da Ermənistana qarşı əsas təzyiq İkinci Qarabağ müharibəsində qismən neytrallığı qorumaq oldu. Son nəticədə Ermənistanı darmadağın olmaqdan xilas etdi. Bizi müharibəni dayandırmağa sövq etdi. Daha sonra Paşinyanın daha da Qərbə meyl etməsi geosiyasətdə Rusiya tərəfdən hansı mənfiliklərə yol açdığı isə məlumdur”.
Politoloq həmçinin qeyd etdi ki, Rusiya ilə Ermənistan arasında münasibətlər göründüyü kimi pis deyil:
“Hazırda hər iki ölkə KTMT-nin üzvüdür və qismən də olsa müttəfiq sayılırlar. Eyni zamanda Ermənistanın cənub sərhədlərini rusiyalı hərbiçilər qoruyur. Ermənistanla Rusiya arasında böyük iqtisadi tərəfdaşlıq var. Əsas olaraq Ermənistanda Rusiya lobbisi heçdə zəif deyil. Bütün bunları nəzərə alsaq, münasibətlər gərginləşsə də qopmayacağı məlumdur”.
Xəyal Ramiz