Rusiya hücumlarından qorunmaq üçün NATO Albaniyada ilk hərbi bazanı açıb. NATO-nun böyük həcmdə genişlənməsi sülhü qorumaqdan çox təhdid altına alır. NATO hərbi kontingentinin Ukraynada mümkün yerləşdirilməsinin xəritəsi ortaya çıxıb. Odessa Rumıniya və Moldova hərbçilərinin nəzarətinə keçəcək. Ukraynada əcnəbi hərbçilərin yerləşdirilməsi mövzusu o qədər də müsbət qarşılanmayan Qərbdə fəal müzakirə olunur. NATO-nun Balkan siyasəti Şərqi Avropanın əsas hissəsi olan Balkanları Rusiyadan qoruya biləcəkmi?
Məsələ ilə bağlı siyasi şərhçi Fuad Abbasov Ednews-a açıqlaması zamanı qeyd edib ki, Balkanlarda güc balansını qorumaq üçün NATO əlindən gələni edir və edəcək:
“NATO-nun Albaniyada hərbi baza açması, əlbəttə ki, Balkan dövlətlərinin güclənməsi mənasına gəlir. Amma burada müəyyən detallara diqqət etmək lazımdır. İlk olaraq bu hərbi baza sıfırdan inşa edilməyib. 1952-ci ildə sosialist qrupuna daxil olan Albaniyanın sovet dönəmində “Stalin” adlandırılan indiki “Kuçova” şəhərində sovet bazasını rekonstruksiya edərək yenidən fəaliyyətə başladıb. NATO bu bərpa işləri üçün 50 milyon avro vəsait ayırmışdı. Sanki NATO Rusiyanın mirasına göz dikərək mənəvi təzyiq göstərir. Bu fəaliyyətə Rusiya tərəfindən siyasi, iqtisadi və ya hərbi cavab verilmədiyi təqdirdə sosialist ölkələrində olan sovet bazaları yeniləyərək öz siyasətinə uyğun istifadə edəcək. Lakin bu hadisə Rusiya-Ukrayna müharibəsindən əvvəl meydana gəlib. Yəni NATO Kuçovadakı hərbi bazanı 2019-cu ildən ələ keçirərək rekonstruksiya fəaliyyətləri başladıb. 5 ildən sonra bu hərbi bazanı öz hərbi birləşmələrinin fəaliyyəi üçün istifadəyə veribdir”.
Fuad Abbasov əlavə olaraq vurğulayır ki, Rusiya-Ukrayna müharibəsindən əvvəldə NATO-nun Balkan ərazilərində yerləşmək, orada hərbi bazalar açmaq və Rusiyadan gələn hər hansı bir təhlükənin qarşısını almaq niyyəti olub:
“Bundan əvvəl slavyan hesab olunan Balkan dövlətləri tarix baxımından Rusiya ilə isti münasibətlərə malik olublar. Ona görə də Rusiyanın Şərqi Avropanın hər hansı bir yerindəki nüfusundan daha çox Balkanlarda və Şərqi Avropada reputasiyası daha çoxdur. Ona görədə NATO-nun bu cür strategiya yürütməsi o qədər də təəccüb doğurmur”.
Xəyal Ramiz