Azərbaycan və Ermənistan arasında sülh müqaviləsinin Bakıda imzalanacağı ilə bağlı iddialar var. Rusiyanın nüfuzlu nəşrləri yazırlar ki, Baş nazir Nikol Paşinyan noyabrda Bakıda keçiriləcək COP29-a qatılacaq, saziş də bu mümkün səfər çərçivəsində imzalanacaq. Belə bir iddia Ermənistanda da gündəmdədir. İki ölkə arasında sülhün COP29 ərəfəsində olması nə dərəcə də real görünür?
Gündəm mövzusu ilə bağlı Beynəlxalq Avrasiya Mətbuat Fondunun prezidenti Umud Mirzəyev Ednews-a açıqlamasında bildirib ki, bu konflikt artıq əsaslı sülhlə bitməlidir. Onun sözlərinə görə, tam bitməyən konflikt yoxdur:
“İstəməzdim ki, barışla nəticələnməyən konflikt olsun. O cümlədən Azərbaycan-Ermənistan münaqişəsinin yaranma səbəbində məhz Ermənistan dayanır.
Bu gün konfliktin bu səviyyəyə çatmasının günahkarı da onlardır. Azərbaycan torpaqlarının 20%-i işğal edən, dağıdan da onlardır. 2020-ci ildə 44 günlük müharibədən sonra atəşkəslə bağlı müqavilə imzalandı. 2023-ci ildə 19-20 sentyabr tarixlərində bu müharibəyə birdəfəlik imza atıldı. İki xalqın bərabər yaşaması isə zamana bağlı bir prosesdir. Barış və əsaslı sülh müqaviləsinin bağlanması hazırda gündəmdədir. Yaxın zamanda Azərbaycanın Qazax rayonunun 4 kəndi də bizə qaytarıldı. Bunlar Bağanis Ayrım, Aşağı Əskipara, Xeyrimli və Qızılhacılı kəndləridir.
Bu artıq barışığa gedən yolda önəmli hadisədir. Proseslər bu yolla davam edərsə, yəni, çözülməli olan problemlər həll olunarsa, COP29 ərəfəsində sülhü görmək mümkün olacaq. Beynəlxalq arenaya nümayiş etdirmək olar ki, iki xalq uzun müddətdən sonra sülhə qovuşdu”.
Sonda Umud Mirzəyev sülh müqaviləsinin Bakıda bağlanması ilə bağlı məsələyə də münasibət bildirdi:
“Sülh müqaviləsinin Bakıda bağlanması tam real ola bilər. Çünki Bakının həm regional, həm də beynəlxalq əhəmiyyəti artmaqdadır. Bu artım təkcə iqtisadi və siyasi mənada deyil, inkişafın bütün sferalarına aid edə bilərik”.
Xəyal Ramiz
