Ukraynanın Azərbaycandakı səfiri Vladislav Kanevski ölkəmizdə dörd aylıq diplomatik fəaliyyətindən sonra bu gün Bakıda jurnalistlərlə görüşüb.
Eurasia Diary xəbər verir ki, o, səfirliyin Bakıda Ukrayna Ticarət Evini, Ukraynanın Bazar Günü Məktəbini açmaq, mədəniyyətlərarası dialoqu inkişaf etdirmək və Azərbaycanda Ukrayna Kino Günlərini keçirmək niyyəti olduğunu deyib.
Səfir maraqlı statistika bölüşüb. Proqnozlara görə, bu il Azərbaycana gələn ukraynalı turistlərin sayı 50 min nəfərə çatacaq və bu göstəricinin artması üçün Bakı ilə Kiyev arasında mülki aviasiya uçuşları şəbəkəsini genişləndirmək lazımdır.
"Ukraynada güclü təsirə malik yarım milyona yaxın azərbaycanlı yaşayır. Bu ölkədə Azərbaycan şirkəti olan SOCAR-ın 60 yanacaqdoldurma məntəqəsi var, bu rəqəmin 100-ə çatdırılmasına çalışılır", - deyən səfir bildirib ki, Kiyevdə avtomobilinin yanacaq çənini SOCAR-ın benzini ilə doldurmağa üstünlük verir.
V.Kanevski qeyd edib ki, Ukraynadakı qaz təchizatı şəbəkələrinin bir hissəsi SOCAR-a məxsusdur.
"Son 10 ildə ölkələrimiz arasındakı ticarətin həcmi yarım milyard dollardan düşərək iki dəfə azalıb. Bu, Ukrayna iqtisadiyyatının 20% -ni təşkil edən Donbassın Rusiya tərəfindən ələ keçirilməsi ilə baş verib. Ukrayna Prezidenti Zelenski hökumətin qarşısına 5 il ərzində ölkənin ÜDM-ni 20% artırmaq vəzifəsi qoyub və belə bir artım imkanı var, çünki Ukraynada illik ÜDM-in artımı 4,5-5% -dir.
Ukraynanın 98% -i Azərbaycan nefti və qazı ilə təmin olunur və Azərbaycanla Avropa arasında bu bazarda vasitəçi olmaq istəyir.
Son 5 ildə Ukrayna dövlət müstəqilliyinin bütün dövrü ilə müqayisədə daha çox sosial və iqtisadi islahatlar həyata keçirib. Ölkədə islahatların inkişafı üçün alətlər yaradılıb, korrupsiyaya qarşı mübarizə aparılır, anti-korrupsiya məhkəməsi yaradılıb. Bilirəm ki, Ukraynada adı korrupsiyada hallanan nüfuzlu məmurların adlarını müəyyənləşdirəcək böyük antikorrupsiya araşdırmaları olacaq", - səfir əlavə edib.
Eurasia Diary-nin sualını cavablandırarkən, səfir bildirib ki, Ukrayna ilə Rusiya arasında 70 əsirin (hər bir tərəfdən 35 əsir) mübadiləsi şübhəsiz ki, müsbət haldır, ancaq hələ də Rusiyada 100-ə yaxın əsir var, bu yaxınlarda Rusiya hakimiyyəti onlara daha bir neçəsini əlavə edib. O, Rusiyanın Azərbaycana Ukrayna vətəndaşlarını qaytardığına diqqət çəkib. Ancaq Kiyev ruslarla birlikdə Ukrayna vətəndaşlarını da Rusiyaya göndərib. Kiyevə göndərilən Ukrayna vətəndaşları arasında öz ərazisində Ukrayna bayrağını qaldıran Krım vətəndaşı da var.
“Ukrayna ərazilərinin işğalının qəbuledilməzliyini və beynəlxalq sərhədlərin tanınmasını nəzərə alaraq iki ölkə arasındakı münasibətlərə dair problem kompleks şəkildə həll olunmalıdır. Yəni, Putinin əsirlərin mübadiləsinin Kiyevin işğal olunmuş ərazilərə olan tələblərinə son qoyacağını düşünməsi yanlışdır", -deyə Kanevski açıqlayıb.
"Biz təcavüzkar bir dövlətin başçısının verdiyi vədlərə inanmırıq; əksinə, onun bəyanatlarının qərəzli olacağını bilirik. Rusiya ilə danışıqlar Normand formatında davam edəcək. Formatın dəyişdiriləcəyini deyirlər" -deyə səfir qeyd edib.
O, Avropa İttifaqının (Aİ) Ukraynadakı Şərq Tərəfdaşlığı proqramının fəaliyyətini yüksək qiymətləndirib. Səfir xüsusən də Ukrayna gənclərinin viza almadan Avropaya getməsi və orada təhsil almalarını, həmçinin Ukrayna və Avropa biznesi arasındakı yeni iqtisadi əlaqələri qeyd edib. Kanevski, Azərbaycanın Aİ ilə ikitərəfli münasibətlərini məhsuldar hesab edir. O, həmçinin Azərbaycan və Ukraynanın da daxil olduğu GUAM-ın genişləndirilməsinin zəruri olduğunu bildirib.
Kamal ƏLİ