Dağlıq Qarabağdakı qondarma rejimin “təhlükəsizlik şurasının” keçmiş katibi, general Vitali Balasanyan yenidən Ermənistan hakimiyyətinin ünvanına kəskin bəyanatlarla çıxış edib.

Eurasia Diary erməni KİV-lərinə istinadən xəbər verir ki, Balasanyan Nikol Paşinyanı hakimiyyətə Qərbin “məlum mərkəzlərinin” gətirdiyini deyib. Onun sözlərinə görə, həmin mərkəzlər Paşinyanı idarə edir və onun nə etməli olduğu haqda göstərişlər verir.

Balasanyan habelə deyib ki, Nikol Paşinyan 2016-cı ildə Yerevanda post-patrul polisi alayının binasının “Sasna Tsrer” terrorçuları tərəfindən ələ keçirilməsindən sonra baş qaldıran etirazları idarə etməyə cəhd göstərib. O, Paşinyanın bu yaxınlarda “Sasna Tsrer” partiyasının liderləri Qaregin Çuqaszyanla və Jirayr Səfilyanla (“Şuşa” batalyonunun komandiri) baş nazirin iqamətgahında görüşünü “başqa cür düşünənlərə qarşı təzyiq cəhdi” adlandırıb.

“Nikol Paşinyan hamını, o cümlədən məni terrorizə etməyə çalışır. Demək istəyi ki, budur, baxın, mənim döyüşkən qanadım da var və bir barmağımın işarəsi ilə sizinlə fiziki haqq-hesab çəkərlər. Mən Paşinyana və “Sasna Tsrer”ə demək istəyirəm ki, ümumiyyətlə belə söhbətlərə girməsinlər, çünki buna görə cavab verəcəklər. Qorxaqlar Paşinyan və onun tərəfdarlarıdır...2016-cı ildə biz o terrorçuları bağışladıq, öldürmədik, amma indi bəyan edirəm ki, əgər mənə qarşı, xalqımıza, dövlətimizə qarşı nəsə təxribat həyata keçirməyə, terror hərəkətlərinə əl atmağa cəhd eləsələr hamısını fiziki olaraq məhv edəcəyik”,-Balasanyan LIVEnews.am nəşrinə müsahibəsində deyib.

O əlavə edib ki, Paşinyan və “Sasna Tsrer” bir terrorçu qrupun elementləridir və bütün dünya erməniləri onlara qarşı addım atmalıdır.

Balasanyanın müsahibəsi sosial şəbəkələrdə geniş müzakirələrə səbəb olub. Ermənistan Təhlükəsizlik Şurasının katibi Armen Qriqoryan özünün Facebook hesabında yazıb: “Vitali Balasanyan özünü xuliqan kimi aparır. Hər dəfə Serj Sərkisyanla Stepanakertdə (Xankəndi,-red.) qrup halında görüşəndən sonra Vitali Balasanyanda kəskinləşmə başlayır və bu da ağıldan kəmliyin əlamətidir. 2016-cı ildə öz siyasi karyerasını Serj Sərkisyanla bağlayan Balasanyan siyasi zibillikdə yerini tapacaq, necə ki, onun lideri hazırda oradadır”.

Balasanyan Dağlıq Qarabağda “prezidentliyə” iddiaçıdır və onun Paşinyanla münasibətləri əvvəldən gərgin idi. V.Balasanyan “Qarabağ qəhrəmanıdır” və Dağlıq Qarabağdakı bir sıra keçmiş səhra komandirləri arasında nüfuzu var, o cümlədən işğalçı qüvvələrin sıralarında təsir imkanlarına malikdir. Paşinyan isə Qarabağda öz adamını hakimiyyətə gətirmək istəyir, bu keçmiş “xarici işlər naziri” Mais Mailyandır. (virtualaz.org)