Bu gün Türkiyənin paytaxtı Ankara şəhərində Kəşmir probemi ilə əlaqədar beynəlxalq konfrans keçirilib. Konfransda çıxış edən Türkiyənin millət vəkili Erkan Akçay dünyanın “6 K” probleminə toxunub. Lakin Anadolu Agentliyində yer alan məqalədə sadəcə 5 problemin (Kəşmir, Kıbrıs, Krım, Kaşqar, Kudüs) adının çəkilməsi və Qarabağın adının hallanmaması diqqəti cəlb edib. Məsələylə bağlı millət vəkili ilə əlaqə saxladıq.
Cənab Akçayın "6 K" məsələsi ilə bağlı Eurasia Diary-ə verdiyi eksklüziv açıqlamanı sizə təqdim edirik:
Türkiyənin xarici siyasətdə daha çox Orta Şərq problemləri ilə məşğul olduğu, Cənubi Qafqazdakı problemlərə çox da müdaxil olmadığı müşahidə edilir. Halbuki, bu regionda Türkiyənin ən önəmli müttəfiqlərindən Azərbaycan və Gürcüstan var. Bunun səbəbini nə ilə əlaqələndirirsiniz?
“Əvvəla, bu sualın ünvanı Xarici İşlər Naziridir. Lakin qeyd edə bilərəm ki, Türkiyənin öncəliyi təhlükəsizlikdir. Sərhədlərinin terrordan təmizlənməsidir. Ona görə də, Türkiyə İraqın və Suriyanın şimalında ardıcıl hərbi əməliyyatlar təşkil edir və regional siyasətdə əsas aktorlardan birinə çevrilib. Bununla birlikdə Türkiyə bütün Türk coğrafiyasının problemləri ilə yaxından məşğul olur, maraqlanır və diqqətdə saxlayır. Qarabağın da sırası gələcək. Sual verə bilərsiniz ki, " Nə zaman?" onda sizə belə cavab verərdim ki, hər şeyin bir vaxtı var. Ama əminəm ki, o gün uzaqda deyil. Türkiyənin Qarabağ problemində mövqeyi konkretdir, dəyişməzdir. Türkiyə Ermənistanla heç bir diplomatik əlaqələr qurmur və Qarabağ işğaldan azad edilmədən bu mövqe dəyişməyəcək”.
Nicat İsmayılov