Prezident Adminstrasiyasının keçmiş rəhbəri, Azərbaycan Milli Elmlər Akademiyasının (AMEA) prezidenti Ramiz Mehdiyevin nəzarətində olan "Bank BTB” Açıq Səhmdar Cəmiyyəti (ASC) məhkəməyə verilib.
EDNews Bizim.Media-ya istinadən xəbər verir ki, Mustafayev Elnur Akif oğlu adlı şəxs Bakı Kommersiya Məhkəməsində sözügedən bank barəsində iddia qaldırıb.
Açıq mənbələrdə işin mahiyyəti barədə məlumat yoxdur. İddia hakim Fərrux Qasımovun icraatındadır.
"Bank BTB" ASC-nin üç səhmdarı var:
1. Mehdiyeva Nigar İsmayıl qızı - 75%
2. Sadiq Rza İsmayıl oğlu - 19%
3. Mahmudova Tükəzban Ağa qızı - 6%
Nigar Mehdiyevanın Ramiz Mehdiyevin gəlini olduğu bildirlir. Bu barədə mediada dəfələrlə yazılıb və qarşı tərəf iddiaları təkzib etməyib.
Nigar Mehdiyeva həm də "Bank BTB”nin digər səhmdarı Rza Sadiqin bacısıdır. Məlumatlara görə, onlar Nazirlər Kabinetinin Humanitar məsələlər şöbəsinin keçmiş müdiri İsmayıl Sadıqovun övladlarıdır. İsmayıl Sadıqov 2018-ci ildə tutduğu vəzifədən azad edilib.
Ramiz Mehdiyevin gəlini olduğu bildirilən Nigar Mehdiyeva "Digital Media” MMC-nin də təsisçilərindən biridir. MMC 20 avqust 2008-ci il tarixində dövlət qeydiyyatına alınıb.
Milli Televiziya və Radio Şurasının 28 oktyabr 2008-ci il tarixli qərarı ilə "Digital Media” MMC-yə 105.5 MHz tezliyində yayımlanmaq üçün radio yayımına xüsusi razılıq (lisenziya) verilib. Şura qərarını "Digital Media” MMC-nin "digər iddiaçılarla müqayisədə daha üstün yaradıcılıq imkanlarına, daha münasib maddi-texniki bazaya və peşəkar kadr potensialına” malik olması ilə əsaslandırıb. Bu şirkət "Media FM” radiosunun sahibidir.
EDNews xatırladır ki, ötən gün də Mehdiyevi AMEA-nın sabiq işlər idarəsi rəisi, Elton Məmmədovun məhkəməyə verib.
Bütün bunları nəzərə alaraq, qeyd edə bilərik ki, Azərbaycan siyasi sisteminin sabiq "bos kardinalı" Ramiz Mehdiyevə qarşı "səlib yürüşü"nə start verilib.
