Azərbaycan Sosial Demokrat partiyasının sabiq sədri Zərdüşt Əlizadənin Azərbaycanda sol partiyaların olmaması barədə açıqlaması hazırda həmin partiyanın başqanı olan qardaşı Araz Əlizadənin və Azərbaycan Kommunist partiyasının sədri Rauf Qurbanovun narazılığına səbəb olub.
EDNews-a açıqlamasında A.Əlizadə bildirib ki, Azərbaycan Sosial Demokrat partiyası hər zaman siyasi səhnədə aktiv fəaliyyət göstərib və bu günə qədər öz gücünü qoruyub saxlayır.
“Mən Zərdüşt Əlizadənin fikri ilə heç razı deyiləm, o, düzgün fikirləşmir. Bizim partiya istənilən məsələ ilə bağlı hər yerdə öz sözünü deyir. Partiyamızın mövcudluğu da göz qabağındadır”.
Azərbaycan Kommunist partiyasının sədri Rauf Qurbanov isə Zərdüşt Əlizadəyə təklif edib ki, gəlib, Kommunist partiyasının proqramlarını və orada qaldırılan məsələləri izləsin.
“Bizim partiyanın siyasi ideologiyası və siyasi xətti var. Biz kommunistlər ölkədə yoxsuluğun azalması, sosial bərabərsizliyin aradan qaldırılması, ən əsası sosial rifahın və ədalətin təmin edilməsi uğrunda mübarizə aparırıq. Bu yolda biz öz siyasətimizi davam etdirəcəyik”.
Rauf Qurbanov Azərbaycanda bütün siyasi partiyaların fəaliyyətində problemlərin olduğunu da vurğulayıb.
“Azərbaycanda hazırki vəziyyət siyasi partiyaların aktiv fəaliyyət göstərməsinə imkan vermir. Bunun səbəblərdən biri parlament seçkilərinin proporsional qaydada keçirilməməsidir. Belə olan halda partiyaların cəmiyyətdə rolu azalır.
Ancaq düşünürəm ki, bu məsələlər zamanında öz həllini tapacaq”.
Sol cərəyanın liderlərindən fərqli olaraq, Milli Məclisin deputatı, sağ cərəyana yaxın olan Azərbaycan Qurtuluş partiyasının sədri Fazil Mustafa isə vurğulayıb ki, Azərbaycanda bir çoxları solçuluğu kommunist ideologiyası ilə bağlayır.
“Əslində bu düşüncə kökündən səhvdir. Sol cərəyan adı altında sosializm nəzəriyyəsinə fərqli münasibət bəsləyən müxtəlif qruplar cəmləşib. Azərbaycanda solçuluğun olmaması zəif intellektual mühitin olması ilə bağlıdır. Məsələn,
Türkiyədə intellektual təbəqə yetişdirən sol cərəyanlar var. Bu cərəyanlar Türkiyənin ictimai-siyasi fəaliyyətində öz adlarını yazıblar. Azərbaycanda bu ideologiyanın olmaması cəmiyyətimizin həm mədəni, həm də intellektual səviyyəsinə təsir edir. Bu normal hal deyil. Düzdür, Zərdüşt Əlizadə, Məmməd Süleymanov və Eynulla Fətullayev solçuluqla bağlı yazılar yazıblar. Amma bu yetərli olmayıb. Siyasi və sosial baxımdan bu məsələyə yenidən baxılmalıdır”.
Fazil Mustafa Azərbaycanda heç sağ təmayüllü cərəyanın da siyasi səhnədə görünmədiyini qeyd edib.
“Ölkədə partiyaların olması üçün təbəqələrin mövcudluğu haqqında təsəvvür olmalıdır. Azərbaycanda nə yuxarı, nə də aşağı təbəqənin təşkilatlanması yoxdur”.
Qeyd edək ki, dünyanın bir çox yerlərində - Avropa və Latın Amerika ölkələri, Türkiyə, hətta Rusiya da sol təmayüllü partiyalar siyasi səhnədə daima aktiv fəaliyyət göstərirlər. 20-ci əsrin axırlarında SSR-nin və Şərqi Avropada sol blokun çökməsi, ümumiyyətlə Marksizm nəzəriyyəsinin tarixə qərq olmasına baxmayaraq, bir çox ölkələrdə radikal (Sosialistlər) və yumşaq ( Sosial Demokratlar) sol cərəyanların hələdə seçkilərdə böyük uğurlar əldə edirlər. Bildiyimiz kimi, sol təmayüllü partiyaların proqramlarında sosial-iqtisadi problemlərin həlli, iqtisadi inkişaf və sosial rifahın təmin edilməsi əsas yer tutur. Onlar yalnız bu yollarla vətəndaşları öz tərəfinə çəkə bilirlər.
Azərbaycanın özündə də sol meyilli partiyalar – Azərbaycan Kommunist Partiyası, Azərbaycan Sosialist Partiyası və Azərbaycan Sosial Demokrat Partiyası fəaliyyət göstərirlər.
Yunis Abdullayev
