“Azərbaycan Respublika Prokorluğunun Arayik Aratyunyanla bağlı qaldırdığı cinayət işi qanuni dəlillər və faktlar üzərində əsaslanır. Aratyunyan 44 günlük müharibədə dinc sakinlərin yaşadığı ərazilərin bombalanmasını əmr verən şəxslərdən biri olub. Bu adamın əli qadınlar və uşaqlar daxil olmaqla, günahsız insanların qanına batıb”.

Bu fikirləri Ednews-a açıqlamasında politoloq Cümşüd Nuriyev bu yaxınlarda erməni politoloq Hrant Məlik-Şahnəzəryanın Azərbaycanın qondarma separatçı rejiminin başçısı Araik Harutyunyanı həbs etdiyi təqdirdə müharibənin yenidən alovlanmasına səbəb olacağı barədə verdiyi açıqlamaya fikir bildirərəkən deyib.

Onun sözlərinə görə, Harutyunyan Azərbaycan vətəndaşıdır, öz torpağında separatizmlə və qeyri-qanuni işlərlə məşğuldur. Onun həbs edilməsi üçün Azərbaycan nə Ermənistandan, nə Rusiyadan icazə almalıdır.

“Qarabağda revanşistlərin Aratyunyana görə, hərbi təxribatlara əl atması boş bir şeydir. Azərbaycan ordusu onlara eləbir dərs verib ki, onlar kiçik bir addım atmaqdan çəkinirlər. Qarabağda hər hansı təxribat yalnız Rusiyanın müəyyən qüvvələrinin göstərişi ilə həyata keçirilə bilər. Həmin qüvvələr erməni və azərbaycanlılar arasında müəyyən qarşıdurmaları yaratmaqla sülhməramlıları bu torpaqlarda əbədi saxlamaq istəyirlər. Rusiyanin Cənubi Qafqaz siyasətində Azərbaycan əsas rol oynayır”.

Politoloq Tofiq Abbasov isə məsələ ilə bağlı fikir bildirərkən qeyd edib ki, Azərbaycanın atacağı qanuni addımlara heç kəsin irad bildirməyə ixtiyarı yoxdur.

“Azərbaycan hüquq-mühafizə orqanları onsuzda gec-tez erməni terrorçuları ilə bağlı tədbirlərini həyata keçirəcək. Araik Harutyunyan və onun ətrafı Azərbaycan dövlətinə və onun xalqına qarşı cinayətlər törədib. Bu adamlar separatizm zəmində terrorizmlə məşğul olublar. Bununla yanaşı, Qarabağda Azərbaycan vətəndaşı olan erməniləri girov kimi saxlayırlar. Qondarma rejimə tabe olmaq istəməyən ermənilərə qarşı zorakılıqlar və təzyiqlər edilir. Bu proseslərin hamısında Azərbaycan beynəlxalq hüquqa söykənərək, lazimi tədbirlər görür”.