10 may 2024-cü il ABŞ Dövlət Departamentində “2024-cü il Ümumdünya Ərzaq Mükafatı Laureatının qalibinin elan olunması mərasimi” keçirilib.
Ednews xəbər verir ki, tədbirdə ABŞ dövlər katibi Entoni Blinken, Beynəlxalq Avrasiya Mətbuat Fondunun tərəfdaşı “Sülhün Kökləri” təşkilatının qurucusu və rəhbəri Heidi Kühn, keçmiş laureatlar, dövlət xadimləri, akademiklər və o cümlədən, Azərbaycanın ABŞ – dakı səfiri Xəzər İbrahim də iştirak edib.
Mərasimə rəhbərlik edən Entoni Blinken Ümumdünya Ərzaq Mükafatının müasir dünyanın ən aktual problemlərindən biri olan aclıq və ərzaq təhlükəsizliyi ilə mübarizədə öz fəaliyyəti ilə seçilən şəxslərə verildiyini və bu səbəbdən mükafatın əhəmiyyətini çatdırıb.
Daha sonra o, mükafatın son qalibi olan Heidi Kuhnün bəşəriyyət üçün gördüyü işlərdən də danışıb və onun fəaliyyətini yüksək qiymətləndirdiklərini bildirib:
“Müharibədən dağılmış torpaqları sülh bağlarına çevirdiyiniz üçün sizə təşəkkür edirik. Siz öz nəaliyyətlərinizlə seçilənlərdən biri olmusunuz.”
Tədbirdə iştirak edən səfir Xəzər İbrahim də öz təəssüratlarını şəxsi “X” profilində paylaşıb. O, qida təhlükəsizliyi məsələsinin vacibliyi və Heidi Kuhnün Azərbaycandakı fəaliyyətini vurğulayıb:
“Qida təhlükəsizliyi bu gün Azərbaycanın da gündəmində olan mühüm məsələdir. Ölkəmizdə minatəmizləmə fəaliyyətinə verdiyi töhfələrə və fermerlərə kənd təsərrüfatı bərpasında fermerlərə göstərdiyi dəstəyə görə Heidi Kühnə təşəkkür edirik. Biz ABŞ-dakı tərəfdaşlarımızla bu sahədə əməkdaşlığı davam etdirməyi səbirsizliklə gözləyirik”.
Qeyd edək ki, Nobel Sülh Mükafatı laureatı Norman Borlauq tərəfindən təsis edilən Ümumdünya Ərzaq Mükafatı dünyada aclıq və qida çatışmazlığı ilə davam edən mübarizədə ümid rolunu oynayır. Həmçinin, məlumat üçün bildirək ki, ötən il mükafatın qalibi olan Heidi Kuhn analoji tədbiri BAMF-ın dəvəti və ANAMA-nın dəstəyi ilə Azərbaycanda səfərdə olarkən buradan canlı izləmişdir.
Xatırladaq ki, ümumilikdə 2 dəfə Azərbaycana səfər edən Heidi Kuhnün əsas məqsədi tərəfdaşları ilə birlikdə ölkəmizin işğaldan azad edilmiş ərazilərində mövcud mina probleminin regionda sabitliyə, davamlı sülhə yaratdığı maneələrini dünya ictimaiyyətinin diqqətinə çatdırmaq və “Minalardan Üzümlüklərə” (Mines to Vines) devizi altında minalarla çirklənmiş ərazilərin əkin sahələrinə çevrilməsinə dəstək göstərməkdir.
Əkbər
