Azərbaycanda bir çox siyasi partiyalardan fərqli olaraq, bəzi partiyalar və onun liderləri Ukrayna müharibəsində Rusiya yönümlü mövqe sərgiləyirlər. Onlar bu müharibədə Rusiyanın haqlı tərəf olduğunu hesab edirlər.

Bu yaxınlarda Azərbaycan Sosial Demokrat partiyasının sədri Araz Əlizadə mətbuata açıqlamasında Ukraynada yerli hakimiyyətin və Ukrayna Silahlı Qüvvələrinin faşist təfəkkürlü olduğunu, Rusiya ordusunun bu ölkədə hərbi əməliyyatları faşistlərə qarşı yönəldiyini bildirib.

Bununla bərabər, Araz Əlizadə Ukraynanın NATO-ya üzvlüyünü Rusiyanın təhlükəsizliyinə təhdid kimi görüb. O, qeyd edib ki, ABŞ Rusiyanı hədəfə almaq üçün Ukraynada öz balestik raketlərini yerləşdirmək və bu ölkəni hərbi bazaya çevirmək niyyətindədir.

Lakin solçu partiyanın rəhbərinin açıqlaması cavabsız qalmayıb. Siyasi partiya liderləri Ednews-a açıqlama verərkən Araz Əlizadənin fikirlərinin səhv və məntiqsiz olduğunu, onun Rusiya daha çox meyl göstərdiyini vurğulayıblar.

“Rusiya beynəlxalq hüququn normalarına və prinsiplərinə məhəl qoymur”.

Müsavat partiyasının sədri Arif Hacılı bu barədə ümüiyyətlə danışmaq istəmədiyini bildirib. Lakin söhbət əsnasında o, qeyd edib ki, Rusiya Ukrayna ərazisinə daxil olaraq onun suvener ərazisinə təcavüz edib.

Müasir Müsavat partiyasının sədri Hafiz Haciyev isə Araz Əlizadənin fikirlərini təkzib edərək Ukraynada heç bir radikal millətçilik və faşist əlamətlərin olmadığını bildirib.

“Volodimir Zelenski xalq tərəfindən seçilmiş bir prezidentdir. Ukraynada hakimiyyət demokratik prinsipləri əsasında formalışıb. Rusiyanın bu dövlətin daxili işlərinə qarışmağa və onun ərazisinə müdaxilə etməyə ixtiyarı yoxdur. Rusiyanın özü faşist dövlətdir”.

Hafiz Haciyev Araz Əlizadənin fikirlərini çürük və onun sovet təfəkkürlü insan olduğunu qeyd edib.

“Əlizadə kimiləri yaxşı bilməlidir ki, Bakıda Qara Yanvar faciəsini törədən və Qarabağı 30 il ərzində erməni işğalı altında saxlayan Rusiyadır”.

Böyük Quruluş partiyasının sədri, millət vəkili Fazil Mustafa da həmçinin Sosial Demokrat partiyasının sədrinin düşüncəsi ilə razı olmadığını deyib.

“Ukrayna çox millətli, multikultural və tolerant bir ölkədir. Rus ordusunun Ukraynaya hücum etməsini və onun ərazisini işğal etməsini heç bir halda haqq qazandırmaq olmaz. Rusiyanın beynəlxalq hüquqa qarşı atdığı addımlar yol verilməzdir. Əgər Ukraynada faşist rejim olsa idi, buna ilk öncə dünya ictimaiyyəti reaksiya bildirərdi”.

Milli Cəbhə partiyasının sədri və Milli Məclisin deputatı Razi Nurullayev Ukraynanın indiyi kimə heç bir qonşu dövlətin ərazisinə müdaxilə etmədiyini qeyd edib.

“Ukraynada faşist ünsürlərin mövcud olduğunu rədd edirəm. Ukrayna heç bir dövlətin ərazisinə müdaxilə etməyib. Bu ölkə heç bir millətə qarşı qətliam törətməyib. Belə olan halda Ukraynada hakimiyyəti necə faşist adlandırmaq olar? Faşist dövlətlər başqa dövlətin ərazisinə hücum edənlər və başqa xalqlara qarşı qırğınlar törədənlərdir. Ukrayna ordusu öz ərazisini və xalqını Rusiyanın təacvüzündən qoruyur. Rusiyanın Ukraynada şəhərləri bombalaması və dinc insanları öldürməsi faşizmdir”.

Yunis Abdullayev