Rusiyanın “RİA Novosti” xəbər portalı Azərbaycana qarşı təxribat törədib. Belə ki, Media orqanı Xankəndidəki separatçı rejimin təmsilçisi Aartak Beqlaryandan müsahibə alan zaman onu "DQR"ın dövlət naziri kimi təqdim edib. Separatçıdan alınan müsahibə isə gün ərzində saytda yayımlanıb.
Məsələ ilə bağlı Ednews-a danışan danışan politoloq Zərdüşt Əlizadə bildirib ki, Rusiyada azad media yoxdur. Bu qurumlar ancaq kiminsə sifarişi ilə fəaliyyət göstərirlər.
“Rusiyadakı media orqanları sifarişlə işləyir. Kim daha çox rüşvət verirsə, onun xeyrinə yalan tirajlayırlar. Rusiyada qərəzsiz çalışan jurnalistlər çox azdır. Onları da müxtəlif yollarla sıxışdırırlar. Əksər rusiyalı jurnalist satqındır. Özlərini, qələmlərini pula satırlar”.
Politoloq qeyd edib ki, məhz elə bu səbəbə görə bu cür media orqanlarının tirajladıqları qərəzli mövqelərinə əhəmiyyət vermək lazım deyil.
“Rusiya mediası artıq bir neçə dəfədir ki, Azərbaycana qarşı qərəzli mövqe sərgiləyir. Bu da onların rüşvət qarşılığında çalışdığını sübut edir. Belə olan halda, biz onların bu cürə davranışlarını görməzdən gəlməliyik. Onlar nə istəyirlər etsinlər, biz öz işimizi görməyə davam edirik”.
Zərdüşt Əlizadə həmçinin qeyd edib ki, Rusiyanın mətbuat orqanları da çalışırlar ki, dövlətin yürütdüyü siyasət kimi balanslaşdırılmış mövqe sərgiləsinlər.
“Buna görə də rəhbərlik redaksiyanın bir şöbəsinə tapşırırlar ki, Ermənistanı, digərinə isə Azərbaycanının maraqlarını müdafiə etməyi tapşırırlar. Bununla da guya balansı qoruyurlar. Rusiyada ekspertlər də bu cür fəaliyyət göstərir. Biri Azərbaycanı, digəri Ermənistanı müdafiə edir. Bununla, guya siyasəti eyniləşdirirlər”.
Siyasi şərhçi təxribatların başında hökumətin olduğunu vurğulayıb:
“Bundan əvvəl də biz Rusiya dövlət orqanlarının saytlarında da Azərbaycana qarşı kifayət qədər qərəzli mövqeyə şahid olmuşuq. Rusiya Müdafiə Nazirliyi təxribata əl atanlardan biri olub. Ona görə, bu məsələdə soyuqqanlı olmaq lazımdır. Əsas Qarabağda tədbir görərək orada baş verə biləcək təxribatların qarşısı alınmalıdır”.
Xanlar Əlibəy
