Qarabağda davam edən bərpa işləri, ərazilərimizin işğaldan azad edilməsi rayonlarımızın, şəhərlərimizin yenidən çiçəklənməsinə, inkişafına zəmin yaradacaq.
Azərbaycanda aparıcı siyasi partiyalar Qarabağla bağlı nə kimi təkliflər, layihələr düşünür?
Bu barədə Ednews siyasi partiya sədirlərinin fikirlərini öyrənib.
Azad Vətən Partiyasının sədri Akif Nağı bildirib ki, partiyanın nizamnaməsində, proqramında əsas məqsədlərdən biri kimi Qarabağda, Zəngəzurda və digər ərazilərdə tam qələbənin əldə olunması məsələsi durur.
“2021-ci ildə Qarabağ Azadlıq təşkilatının vaxtında tam qələbə modeli deyilən sənəd qəbul etdik. Həmin sənədi, konsepsiyanı Milli Məclisə, Prezidentə, mətbuata da göndərdik. Məqsədlərimizi müəyyənləşdirmişdik ki, tam qələbə dedikdə Qarabağın tamamilə işğaldan azad edilməsi, Azərbaycanın nəzarətinə qaytarılması, sülhməramlı deyilən rus qüvvələrinin ərazimizdən çıxarılmasıdır. Xankəndi, Xocavənd, Ağdərə, Əskəran və digər ərazilərin tam bərpa olunması nəzərdə tutulur. Bu istiqamətdə işlərimiz davam edir. Azərbaycan bütün çətinliklərə baxmayaraq Xankəndi və digər ərazilərdə hakimiyyətini və suverən hüquqlarını bərpa etməlidir. O istiqamətdə işlər aparılmalıdır. Partiya olaraq da Qarabağın tam azadlığı uğrunda işlərimizi davam etdiririk. Bununla bağlı Beynəxlaq Qarabağ adlı forumumuz da fəaliyyət göstərir. 2015-ci ildə yaranan forum Qarabağ həqiqətlərinin dünyaya təbliği barəsindədir. Azərbaycan cəmiyyətinin birliyi, vahid iradəsi qorunub saxlanılmaldır. Hələ də təxribatlar çoxdur, ermənlər geri çəkilmir”.
Müasir Müsavat partiyasının sədri Hafiz Hacıyev isə qeyd edib ki, bu gün Ali Baş Komandan doğru siyasət yürüdür.
“Biz partiya olaraq prezidentimizi dəstəkləyirik. Düşünürük ki, təcili şəkildə Xankəndi, Xocalı, Ağdərə işğalçılardan azad edilməlidir. Azərbaycan bayraqları orada sancılmalıdır. Qısa müddətdə millətimizlə dövlətimizin birliyi bu məsələdə qəti sözünü deyəcək. Qarabağ müharibəsində partiyamızdan 6 nəfər şəhid verdik, 3 nəfər də qazimiz var. Biz bundan sonra da Ali Baş Komandanın Qarabağ məsələsində atacağı hər bir addımda onun yanında olacağıq. Qarabağa təcili köç başlamadlıdır. Bu bizim konsepsiyamızdır. Quruculuq işlərində də millət fəal iştirak etməli, hər şeyi dövlətdən gözləməməlidir. Qarabağda yaşayan ermənilər bizim qanunlara, konstitusiyamıza əməl etsələr, razı olsalar bizlə yaşaya bilərlər. Biz onları özlərinin terroristlərindən də xilas edib, onlara himayədarlıq edə bilərik. Təcili şəkildə Xankəndində dövlətimizin bütün səlahiyyətli qurumları fəaliyyətə başlamalıdır. O cümlədən Xankəndinin meri təyin edilməlidir. Artıq zamanı çatıb”.
AĞ partiyanın sədri Tural Abbaslı isə deyib ki, partiyada bununla bağlı xüsusi proqram qəbul edilməyib, amma dönəm-dönəm müxtəlif mövzularla bağlı mövqe bildirilib.
“İşğaldan azad olmuş ərazilərin ilk növbədə minalardan təmizlənməli, sürətli şəkildə əhalinin Qarabağa köçürülməsi istiqamətində işlər aparılmalıdır. Hazırda tikinti üzrə müəyyən şirkətlər işlər görür orda. İnsanların ora kütləvi qayıtması, məskunlaşması tezliklə olmalıdır. Təbii ki, burada özəlləşdirmə məsələsi, torpaq bölgüsü var. Bizim də təklifimiz odur ki, insanlara əvvəlki ata-baba yurdları əvvəlki planlara uyğun paylanılsın. Hakimiyyətin bununla bağlı müxtəlif yanaşmaları var. Kəndlərin birləşdirilməsi prosesi olmamalıdır, insanlara müəyyən məbləğlər verilməlidir. O məbləğə uyğun onların evlərini bərpa etməsi üçün şans verilməlidir. Minalar sürətlə aradan qaldırılmalı, işçi qüvvəsini artırlmalıdırlar. Qarabağ deyəndə, ilkin olaraq məskunlaşma prosesi başa çatmalıdır”.
Oğuz Ayvaz