İranda müəyyən müddət sakitlik hökm sürsə də, etiraz dalğası yenidən alovlanmağa başlayıb. Ölkənin İsfahan və digər şəhərlərində nümayişçilər ilə təhlükəsizlik qüvvələri arasında ciddi toqquşmalar müşahidə edilir. Bununla yanaşı,

İsfahanda etirazlar zamanı nümayişçilər Qasim Süleymaninin heykəlini yandırıblar. 

 

Bəzi ekspertlər hesab edirlər ki, İranda mütəmadi davam edən etirazlar yaxın gələcəkdə molla rejiminin sonuna yaxınlaşdıran növbəti inqilaba gətirib çıxaracaq. 

 

Lakin politoloq Zərdüşt Əlizadə İranda hazırki proseslər barədə fərqli münasibət bildirib. 

 

O, Ednews-a açıqlamasında qeyd edib ki, İranda molla rejimi yalnız islami-üsul idarəsində fikir-ayrılıqların baş verdiyi təqdirdə devrilə bilər. 

 

“Bəlli, İran hazırda siyasi və iqtisadi cəhətdən böhran vəziyyətindədir. Bununla bərabər, mərkəzi hakimiyyət mənəvi böhrandan da əziyyət çəkir. Lakin bu ölkədə növbəti inqilabın baş verəcəyi ilə bağlı müzakirələr aparanda, özümüzə mütləq sual verməliyik. İranın hakim zümrəsində parçalanma varmı? İranın siyasi-dini rəhbərliyində rəhbəri devirmək və rejimi dəyişmək kimi fikirləri dolaşırmı? Həqiqətdə isə İranın hakim zümrəsində belə hallar mövcud deyil. Məsələn, SSRİ-nin dağılmasının əsas səbəblərdən biri sovet rəhbərliyində anti-sovet hakimiyyəti təbliğatının aparılması idi. Yəni, SSRİ-nin hakim zümrələri xalq mülkiyyətini ələ alıb varlanmaq üçün sovet qurluşunu dağıtmaq və onu qərb modelinə uyğun üsul-idarəsi ilə dəyişməkdə qərarlı idilər.  Öz istəklərinə də nail oldular. İranda hələ ki,  bu kimi halların əlamətləri görünmür. Hakim zümrədə rejimi dəyişməyə çalışan ünsürlər yoxdur”. 

 

Ölkəni bürüyən etirazlara və nümayişlərə gəlincə isə politoloq....

 

“Hər yerdə xalqdan hər zaman alət kimi istifadə ediblər. Xalqın qabağına bir təxribatçı salırlar, o da xalqı uçuruma, ölümə və məhvə aparır. 1988-1990-ci illərdə Azərbaycanda vüsət alan geniş xalq hərəkatı axırda boş vədlər uğrunda uğursuzluğa düçar olub getdi. Eyni vəziyyət Rusiya və digər post-sovet ölkərində də baş verib. Biz xalq etirazları deyəndə özümüzü aldatmayaq. Siyasətə və tarixə nağıl kimi baxmayaq. Xalq ayağa qalxdı və rejimi devirdi kimi sözlər boş illuziyalardır. Əslində xalqın başını aldadıb şirinkiləşdirmək üçün təxribatçılardan və agenturadan istifadə edirlər”.

 

Sonda Zərdüşt Əlizadə xarici qüvvələrin İranı parçalamaq üçün etnik qarşıdurmadan istifadə etmək niyyətində olduğunu bildirib. 

 

“İslam respublikasının hakim zümrəsi İranın dağılmasında və parçalanmasında maraqlı deyil. Xarici siyasi qüvvələr İranda xalqların etirazlarına və etnik millətlər arasında qanlı qarşıdurmanın olmasına çalışırlar. Əgər mərkəzi hakimiyyət zəif olarsa və qətiyyət göstərməzsə, ölkədə etnik zəmində təlatümlər daha da alovlanacaq”.

 

Yunis Abdullayev 

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary