Azərbaycan Hökumətinin təşəbbüsü və Minatəmizləmə Agentliyininin (ANAMA) təşkilatçılığı ilə “Mina Təhlükəsi ilə Mübarizə: çağırışlar və imkanlar” mövzusunda beynəlxalq tədbir keçirilir.
Ednews xəbər verir ki, keçirilən tədbirdə dünyanın 28 ölkəsindən minatəmizləmə sahəsində fəaliyyət göstərən beynəlxalq təşkilatların, əməliyyat və istehsalçı şirkətlərin 60-dan yuxarı nümayəndəsinin iştirakı nəzərdə tutulub.
Tədbirin əsas məqsədi mina təhlükəsi ilə mübarizədə maraqlı olan tərəflərin diqqətini Azərbaycanın qarşılaşdığı mina probleminə yönəldərək, beynəlxalq iştirakçılar və qurumlar arasında əlaqələrin gücləndirilməsi, təcrübə mübadiləsinin aparılması, minatəmizləmə sahəsində istifadə olunan yeni metodların tətbiqi imkanlarını araşdırmaqla, “minasız həyat” təşəbbüslərinə dəstək göstərməkdir.
Sözügedən mövzuda keçirilən tədbir əməkdaşlığa dair ümumi platformanın yaradılması, innovativ sistemlərin tətbiqinin genişləndirilməsi, eləcə də bu sahə üzrə metodologiyaların beynəlxalq standartlara inteqrasiyasının gücləndirilməsi üçün böyük əhəmiyyət kəsb edir.
Tədbir çərçivəsində iştirakçı şirkət nümayəndələri tərəfindən mina təhlükəsi ilə mübarizədə müasir qlobal çağırışların müzakirəsi və yeni həll üsullarının tətbiqi mövzularında təqdimatlar, eləcə də əməliyyatçı qurumlar və istehsalçı şirkətlərin məhsullarından ibarət sərgi nümayiş olunacaq.
Qeyd edək ki, noyabrın 16-da başlanılan tədbir noyabrın 18-dək davam edəcək.
