İranda molla rejimi əleyhinə iki aydan çoxdur davam edən nümayişlər artıq pik həddə çatıb. Ölkənin bir çox şəhərlərində, xüsusilə azərbaycan türklərinin, kürdlərin, ərəblərin və bəlucların yaşadığı bölgələrdə etirazçılar və təhlükəsizlik qüvvələr arasında baş verən ciddi toqquşmalar xeyli insan itkisinə səbəb olub. Məlumata görə, iğtişaşlar zamanı İranda 419 nəfər dinc nümayişçinin öldürüldüyü bildirilib.
Eyni zamanda sosial şəbəkələrdə yayılan məlumatlara görə, artıq bəzi etirazçılar nümayişləri zor gücü ilə yatırmağa çalışan BƏSİC və SEPAH qüvvələrinə qarşı silahlardan istifadə etməyə başlayıblar. Artıq SEPAH-ın konvoylarına ciddi hücumların edildiyi də müşahidə edilib.
Bununla bərabər, İranın Qərbi Azərbaycan vilayətində kürdlərin kompakt yaşadığı Mahabad və Piranşəhr şəhərlərində kürdlərlə və SEPAH arasında şiddətli atışmaların getdiyi deyilir.
Güney Azərbaycan Milli Azadlıq Cəbhəsinin beynəlxalq məsələlər üzrə məsul şəxsi, o cümlədən GÜNAZ TV-nin rəhbəri Əhməd Obalı hesab edir ki, xalq etirazlarının və üsyanlarının mütəmadi davam etməsi molla rejimin sonuna gətirib çıxaracaq.
O, Ednews-a özəl çıqlamasında qeyd edib ki, rejimin sonuna qədər gücdən istifadə edib mövcudluğunu davam etdirməkdən başqa çarəsi yoxdur.
“Mollalar heç bir ölkəyə qaça bilməyəcəklər və onlar millətin əlinə düşdüyü halda param-parça olacaqlar. Çünki mollar 40 ildir millətə və xalqlara eləmədiyi zülm qalmayıb. Millət də geri oturmayacaq və mübarizəsini davam etdirəcək. Belə olan halda daha çox qanın tökülməsi gözlənilir. Etirazlar və nümayişlər mütəmadi davam edərsə, nəticədə üç və ya dörd ay içərisində rejim tab gətirməyəcək və devriləcək. Həmçinin, rejimin içərisində fikir ayrılıqları və parçanlamalar da müahidə ediləcək. SSRİ-nin və Pəhləvi rejimin son dövrlərində baş verən proseslərin eynisi İslam Respublikasında müşahidə edilməsinə heç bir şübhə yoxdur. Bu rejim məhv olmağa məhkumdur”.
Əhməd Obalı kürdlərlə və təhlükəsizlik qüvvələri arasında silahlı atışmaların olması barədə dolaşan məlumatları təkzib edib.
“Əlbəttə, kürdlərin yaşadığı ərazilərdə vəziyyət çox gərgindir. Amma mətbuatda deyildiyi kimi, o bölgələrdə ciddi silahlı atışmalar yoxdur. Yalnız kiçik miqyasda silahlı insidentlər yaşanır. Əgər kürdlər silahlı toqquşmalara cəlb olunsalar, rejim tərəfindən ağır məğlubiyyətə düçar olacaqlar. Rejim bütün hərbi vasitələrdən istifadə edib silahlı üsyanları amansızca yatıracaq. Qanın tökülməsi və ölüm-itim olması rejimin ürəyindən keçir. Kürdlərin bu arzusu inqilaba yalnız ziyan vura bilər”.
Güneyli fəalın sözlərinə görə, ərəblər, bəluclar, eləcə də azərbaycanlıların silahlı mübarizəyə getmək niyyətləri yoxdur.
“Biz Azərbaycan türkləri sivil və mədəni şəkildə mübarizə aparılmasının tərəfdarıyıq. Biz silahlı mübarizəyə qarşıyıq. Əgər bizim tərəfdə kimlərsə silaha əl atmaq düşüncəsindədirsə, səhv və yalnış yolu seçəcəklər. Silahlı mübarizənin zamanı deyil”.
Xalqların milli-mədəni istiqlaliyyət mübarizəsinə toxunan Əhməd Obalı hesab edir ki, İranda hər bir xalq öz milli hökumətinin formalaşmasına nail olmaq amalından əl çəkməyəcək.
“Bildiyimiz kimi, İran çoxmillətli bir dövlətdir. Bu ölkədə hər bir xalq və etnik qrup öz coğrafi ərazasində yaşayır. Yüz ildən çoxdur ki, İranda qatı fars millətçiliyi və milli ayrı-seçkilik hökm sürür. Qeyri-fars millətlərin dil və mədəni hüquqları və azadlıqları tapdalanır, milli kimliyə görə təhqir olunur və onları farslaşdırmaq üçün hər vasitədən istifadə olunur. Artıq bu zülmdən yorulan xalqlar öz hüquqları uğrunda ciddi etirazlara qalxıblar. İranda bütün xalqlar İslam Respublikasının devrilməsini və öz milli hökumətinin qurulmasını istəyirlər. Əlbəttə, federal İran xəttini dəstəkləyənlər də kifayyət qədərdir. Amma biz Azərbaycan türkləri öz müstəqilliyimizə və istiqlaliyyətimizə nail olmaq amalındayıq. Ərəblər və Bəluclar da müstəqilliyi dəstəkləyirlər. Zamanın nə vaxt yetişəcəyindən asılı olmayaraq, İranın parçalanması mütləq baş verəcək”.
Yunis Abdullayev
