Rusiya sülhməramlı qüvvələrinin müvəqqəti nəzarəti altında olan ərazilərimizə hərbi sursatların daşınması və qeyri-qanuni erməni silahlı birləşmələrinin yerləşməsi haqqında yayılan məlumatlar səngimək bilmir. Eyni zamanda sülhməramlıların himayəsi altında olan ərazilərdə yerləşən erməni silahlıları ordumuzun mövqelərini atəşə tutur və təxribatyönümlü təlimlər həyata keçirirlər.
Bu kimi qanunsuz əməllərin və halların sakit tərzdə qarşısının alınması üçün Azərbaycan Müdafiə Nazirliyi və Dövlət Təhlükəsizlik Xidməti dəfələrlə bəyanat verib, hətta son vaxtlar Rusiya sülhməramlılarının rəhbərliyinə xəbərdarlıq edilir.
Lakin sülhməramlıların rəhbərliyi bəyanatlarımıza və xəbərdarlığımıza məhəl qoymur və ermənilərin özbaşnalıqlarına şərait yaradırlar.
Məsələ ilə bağlı Ednews – a açıqlamasında hərbi ekspert Ramiz Şərifov hesab edir ki, Rusiya bu kimi qanunsuz və təxribatyönlü addımlara şərait yaratmaqla regionda zəifləmiş mövqeyini möhkəmləndirməyə çalışır.
Onun sözlərinə görə, Moskva Azərbaycana və Ermənistana təsir rıçaqlarını əldən vermək istəmir.
“Bölgədə Azərbaycanın mövqeyinin günü-gündən möhkəmlənməsi, Türkiyə və İsrail ilə siyasi-hərbi münasibətlərini inkişaf etdirməsi və Rusiyanın təsirindən uzaqlaşması Kremli çox narahat edir. Məhz bu səbəblərə görə, rus sülhməramlıları ermənilərə Qarabağa qanunsuz silah-sursat daşımalarına, yeni səngərlər yaratmasına və təxribatlar törətməsinə imkan yaradır. Ruslar heç vaxt sülhə meyilli olmayıblar. Sovet ordusunda uzun müddət xidmət edən hərbiçi kimi deyə bilərəm ki, rus ordusunun doktrinasında sülh missiyası önəmli xarakter daşımayıb. Onu da qeyd edim ki, BMT-nin nəzdində fəaliyyət göstərən rus sülhməramlıları yalnız hər hansı qüvvənin siyasi və iqtisadi maraqlarına xidmət edirlər”.
Ekspert qeyd edib ki, Azərbaycan ordusu bölgədə erməni təxribatlarının qarşısının alınması üçün hər zaman hazır mövqedə olmalıdırlar.
“10 noyabr bəyanatına əsasən, Azərbaycan sülhsevər ölkə kimi dəfələrlə bəyanat yayıb ki, Azərbaycan ərazisində üçüncü bir dövlətin silahlı birləşmələri ola bilməz. Rusiya sülhməramlıları bütün erməni silahlılarını tərkisilah etmək öhdəliyi götürüb. Lakin biz görürük ki, ruslar öz öhdəliyini pozaraq qanunsuz addımlara yol açır. Müdafiə və təhlükəsizlik səviyyəsində ölkə rəhbərliyi dəfələrlə özbaşnalıqlarla bağlı onlara xəbərdarlıq edib. Amma bizim də səbrimiz bir həddi var. Azərbaycan ordusu yaxın zamanda mütləq növbəti anti-terror əməliyyatları həyata keçirəcək”.
Sonda Ramiz Şərifov vurğulayıb ki, növbəti hərbi əməliyyatlarda Azərbaycan silahlı birləşmələri Xankəndi, Ağdərə, Xocalı və Xocəvənd istiqamətlərində bir sıra əraziləri nəzarətə götürəcək.
“44 günlük Vətən müharibəsinin sonunda ordumuz Xankəndiyə yaxınlaşmışdı. Həmin vaxt bütün ermənilər şəhəri tərk edərək qaçmışdılar. Odumuzun şəhərə girməyə imkanları var idi. Növbəti hərbi əməliyyatlarda Ermənistan, Rusiya, eləcə də digər dövlətlər bizim qarşımızı ala bilməyəcək. Biz ərazi bütövlüyümüzü tam təmin edəcəyik”.
Yunis Abdullayev
.jpg)
