Bakıda “Gender əsaslı zorakılığa qarşı 16 günlük fəallıq” kampaniyasına həsr olunmuş konfrans davam edir.
Ailə, Qadın və Uşaq Problemləri üzrə Dövlət Komitəsinin sədri Bahar Muradova kampaniya çərçivəsində çağırış edib.
Ednews xəbər verir ki, o, müraciətində bu gün dünyanın hər yerində, qadınlara və qızlara qarşı zorakılıqla mübarizəyə həsr olunan kampaniyanın davam etdiyini bildirib:
"Çünki ailələrimiz və cəmiyyətlərimizin ahəngdar inkişafını təhdid edən bu ciddi problem dünyada baş verən münaqişələr, təbii fəlakətlər, o cümlədən COVID-19 pandemiyasının gətirdiyi məhdudiyyətlər səbəbindən zorakılığın miqyasını daha da genişləndirir. Bütün dünyada olduğu kimi ölkəmizdə də maraqlı tərəflərin bu fenomenlə fasiləsiz mübarizə aparması və bu sahədə tədbirlərin şaxələndirilməsi müsbət nəticələrin əldə edilməsinə səbəb olub. Həmçinin yerli səviyyədə resurs mərkəzləri, zorakılığa qarşı monitorinq qrupları, dövlət və qeyri-dövlət Qaynar Xətt və Dəstək Xətt xidmətləri fəal şəkildə çalışırlar. Psixoloji konsultasiya və müvafiq xidmətlərə yönləndirmə işləri daha peşəkar şəkildə təşkil olunur. Bu və digər mexanizmlər vasitəsilə real dəyişiklik yaratmağa yönəlmiş dövlət siyasətimiz hər il- 25 noyabr - 10 dekabr qadınlara və qızlara qarşı zorakılıqla mübarizəyə həsr olunan "16 Günlük Qlobal Fəallıq kampaniyası" vasitəsilə də icra olunur.
Bu əlamətdar gündə tərəfdaşlarımızı şiddətin qarşısının alınması, qurbanların müdafiəsi, uzunmüddətli və davamlı dəstək üçün səfərbər olmağa çağırıram. Gəlin hamılıqla dünyamızı qadın və qızların rahat yaşaya biləcəyi təhlükəsiz bir məkana çevirmək üçün "Qarşılıqlı hörmət və sevgi əsasında birləşək!", - müraciətdə qeyd edilib.
Xatırladaq ki, bu kampaniyaya Beynəlxalq Avrasiya Mətbuat Fondu və Prezidenti Umud Mirzəyev də Bahar Muradovanın “Gender əsaslı zorakılığa qarşı 16 günlük fəallıq” kampaniyasına dəstəkçidir.
Başladılan aksiya ilə bağlı Umud Mirzəyev açıqlamasında qeyd edib ki, uzun illərdir ki, BAMF-ın həyata keçirdiyi bütün layihələrdə əsas hədəflərdən biri də məhz bu məqsəd olub.
“Hər zaman əməkdaşlarımız arasında da qadınlara daha çox üstünlük vermişik. Onlara maksimum şərait yaratmağa çalışımışıq. Biz “Gender əsaslı zorakılığa qarşı 16 günlük fəallıq” kampaniyasını dəstəkləyirik. Çünki bu cür kampaniyalar cəmiyyət üçün, qadınlara şiddətə qarşı hər zaman faydalı və işıqlıdır”.