Xəbər verdiyimiz kimi, bu gün azərbaycanlı ekoloqlar Xankəndi-Şuşa yolunda Azərbaycanın qızıl yatağının qanunsuz istismar edilməsinə qarşı etiraz aksiyasına başlayıblar. Azərbaycan hərbçiləri Xankəndi-Şuşa yoluna, aksiyanın keçirildiyi yerə gəliblər. Onlar azərbaycanlı jurnalistlərin Xankəndinə doğru keçməsinə kömək etməyə çalışırlar, lakin sülhməramlılar buna mane olurlar. Rus sülhməramlıları Xankəndi-Şuşa yoluna əlavə qüvvə cəlb edib. Maraqlıdır ki, üçtərəfli bəyannamədə də silahsız mülki Azərbaycan vətəndaşlarının Xankəndiyə və digər ərazilərə keçməsinə dair yasaqlanacaq heç bir müddəa yoxdursa bu hadisələrin baş verməsinə səbəb nədir?
Məsələ ilə bağlı Ednews-a danışan politoloq Tofiq Abbasov bildirib ki, ekoloqlar və aksiyada iştirak edən insanların hər biri Azərbaycan vətəndaşlarıdır. Onlar Azərbaycan torpaqlarında hərəkət edirlər.
“Qarabağın bu ərazilərində ermənilər lazımsız, təhlükəli işlərlə məşğul olurlar. Biz neçə dəfə şahidi olmuşuq ki, onlar bizim torpaqlarımızda necə vandalizm hərəkətləri sərgiləyiblər. Onlar ilk növbədə urbisid kimi dəhşətli hadisələrə qol qoyublar. Bu gün bizim ictimai şəxslərimiz də bu prosesdən narahatdırlar. Artıq açıq-aydın görürük ki, rus sülhməramlıları da ermənilərin özbaşınalığına, onların qeyri-qanuni işlərinə göz yumurlar, hətta rəvac verirlər. Belə olduqda təbii ki, biz öz fikrimizi bildirməliyik. Bu qeyri-qanuni proseslərin qarşısını almalıyıq. İlk növbədə Qarabağ Azərbaycan torpağıdırsa necə ola bilər ki, bizim vətəndaşlarımızın ora ayağı dəyməsin”.
Politoloq həmçinin qeyd edib ki, hər hansı bir qüvvə bizə maneə yaratmaq istəyərsə biz də buna qarşı ciddi tədbirlər görəcəyik.
“Müharibə dövründə də şahid olduq ki, beynəlxalq təşkilatlar bu problemə biganə yanaşır, tərəf tuturlar. İllər ərzində Azərbaycanın tarixi abidələri məhv edildi, UNESCO buna göz yumurdu. Bu proseslərdə biz kifayət qədər təcrübə qazanmışıq. İcazə verməyəcəyik ki, bizim ərazimizdə ermənilər və onlara qulluq edən məsul qüvvələr bu qeyri-qanuni fəaliyyətlərini davam etdirsinlər”.
Ayan Rzayeva
