"Artıq üç gündür ki, aksiya davam edir və ilk saatlardan bəri biz buradayıq. Rusiya sülhməramlılarının müvəqqəi yerləşdiyi Laçın-Şuşa-Xankəndi yolunun Şuşa girişi hissəsində sülhməramlıları yolu bağlaması nəticəsində bizim media nümayəndələrimizin və mətbuat əməkdaşlarının hərəkəti mədudlaşdırılıb. Biz də öz torpaqlarımıza girişin məhdudlaşdırılması kimi arzuolunmaz hərəkətlərə görə haqlı olaraq General mayor Volkovu çağırırıq".

Bu sözləri İrəli İctimai Birliyinin əməkdaşı İlkin Quluzadə Ednews-a verdiyi özəl açıqlamasında deyib. İİB əməkdaşı aksiya iştirakçılarının torpaqlara girişin məhdudiyyətinin səbəbini tələb etdiyini də vurğulayıb.

"Biz mütəmadi olaraq özümüzə nə üçün torpaqlarımıza gedə bilmirik sualını veririk. Üç gün ərzində Volkovdan nəinki gəlmək, hətta xəbər belə çıxmadı. Bugün səhər 10:30 dan etibarən Rusiya sülhməramlılarının  əlavə zabitləri buraya cəlb olundu. Bu da onların yolu açmaq əvəzinə, daha da bağlamaq niyyəti olduğunu göstərdi. Bu proses uzandıqca nəinki bizim ekologiyamıza, hətta dünyanın ekologiyasına da təsir göstərir".

İlkin Quluzadə yataqlarımızın qanunsuz istismar məsələsindən əlavə, əldə olunan zərərli maddələrin də çaya axıdıldığını deyib:

"Bu həm təbiətimizə, həm də canlılarımıza təsir göstərir. Aksiyanı sonuna qədər davam edəcəyik. Müsbət nəticə alana qədər dayanmayacağıq".

Söhbət zamanı gənc aktivist aksiya iştirakçılarının əhval-ruhiyyəsindən də söz açıb.

"Demək olar ki, heç bir sıxıntı yaşamamışıq. Mütəmadi olaraq qidayla təmin olunuruq. Mən 3 gündür ki yatmamışam, amma əhvali-ruhiyyəmiz yüksəkdir. Bütün gecə milli musiqilərə qulaq asaraq aksiyaya davam etmişik. Qalanan tonqallar vasitəsilə də istiliyimiz təmin olunur. 

Qeyd edim ki, bu mənim Şuşaya ilk gəlişim deyil. Amma bugünki gəlişimin məqsədi məhz Şuşanı gəzmək deyil də, birbaşa olaraq bu qanunsuz hərəkətlərə etirazımı bildirərək dövlətimizə, təbiətimizə zərər verən bu ekoloji terrora yox deməkdir”. 

Nəzrin Beydiyeva