“Azərbaycan və erməni xalqları arasında sülhün və barışığın bərqərar olunması Rusiyanın regionda geosiyasi maraqlarına uyğun deyil”.
Bu sözləri Ednews-a açıqlamasında politoloq Zərdüşt Əlizadə Qarabağ ermənilərinin Azərbaycan cəmiyyətinə reinteqrasiya imkanlarını şərh edərkən bildirib.
Söhbət zamanı o, qeyd edib ki, Moskva hər vasitə ilə hər iki xalq arasında qarşıdurmanın saxlanılmasına və problemlərin həll olunmamasına çalışır.
“Hüquqi cəhətdən Rusiya Sülhməramlı Kontigenti Qarabağda sülhün bərpa olunması istiqamətində Azərbaycan və erməni xalqları arasında hər hansı təmasların qurulmasına yardımçı olmalıdırlar. Amma rus hərbiçiləri münaqişənin həll olunmasında maraqlı deyillər. Rəhbərliyin tələbi ilə rus sülhməramlıları öz öhdəliklərinə zidd olaraq iki xalqın nümayindələrinin qarşılıqlı dialoqa və danışıqlara cəlb olunmasına maneçilik törədirlər. Təmasların baş verməməsi üçün var-gücləri ilə problemlər və əngəllər yaradırlar. İki il ərzində bölgədə baş verən proseslər bunu aydın sübut edir”.
Politoloqun sözlərinə görə, Azərbaycan tərəfi müxtəlif təkliflər irəli sürməklə, eləcə də ciddi tədbirlər görməklə, Qarabağ erməniləri ilə birbaşa təmasların qurulmasında addımlar atır.
“Ərazilərimizdə qarşılıqlı etimadın və etibarın bərpası regional siyasətimizdə əsas priotet hesab olunur. Məqdədimiz budur ki, Qarabağda qanunlarımız çərçivəsində sülh və barışıq olsun, ən əsası da rus hərbçiləri ərazilərimizi tərk etsinlər. Laçın dəhlizində son nümayişlər və aksiyalar, o cümlədən digər fəaliyyətlər bütün bunların nail olunmasına yönəlib. Biz çox yaxşı biliriq ki, ermənilərin cəmiyyətimizə reinteqrasiya prosesi Rusiyanın geosiyasi məqsədlərinə və manəfelərinə ziddir”.
BMT-nin Qarabağda reinteqrasiya prosesinə cəlb olunması ehtimalına münasibət bildirən Z.Əlizadə hesab edib ki, beynəlxalq təşkilatın rusların olduğu yerdə öz sözünü deməyə imkanı yoxdur.
“BMT yalnız öz iqamətgahında azərbaycanlılar və ermənilər arasında müzakirələr və danışıqlar təşkil edə bilər. Ancaq ermənilər ilə danışıqların aparılması üçün xeyli meydançının olduğunu da nəzərə almalıyıq. Moskva, Brüssel və Vaşinqtonda, hətta Tiflisdə belə Azərbaycan və Ermənistanın dövlət rəsmiləri, eləcə də Qarabağın azərbaycanlı və erməni cəmiyyətlərinin nümayindələri reinteqrasiya prosesinin istiqamətləri barədə danışıqlar apara bilərlər”.
Zərdüşt Əlizadə reinteqrasiyada bir çox önəmli məsələlərin yer almasının zəruriliyini vurğulayıb.
“Biz özümüz ərazilərimizdə erməni əhalisi ilə münasibətlər qurmalıyıq. Reinteqrasiya prosesində sosial rifah, iqtisadi imkanlar, əmin-amanlıq, sərbəstlik və milli mənliyin qorunması kimi məsələlər nəzərə alınmalıdır. Yalnız bu istiqamətlərdə erməni əhalisini razı sala bilərik”.
Yunis Abdullayev
