Xəbər verdiyimiz kimi, dekabrın 26-da Rusiya Federasiyasının Sankt-Peterburq şəhərində MDB dövlət başçılarının iclası keçirilib. İclas çərçivəsində Azərbaycan Respublikasının Prezidenti İlham Əliyev, Rusiya Federasiyasının başçısı Vladimir Putin və Ermənistanın baş naziri Nikol Paşinyan arasında üçtərəfli görüş olub.
Azərbaycan ərazilərini işğaldan azad etsə də, Bakı ilə İrəvan arasında münasibətlər hələ də gərgindir. Ermənistanın sülh müqaviləsinin icrasını gecikdirməsi bu gərginliklərin ən başlıca səbəbi saymaq olar.
Ümumiyyətlə, MDB hər hansı siyasi qərarın qəbul edildiyi platforma rolunu icra edirmi?
Məsələ ilə bağlı Ednews-a danışan politoloq Oqtay Qasımov açıqlamasında bildirib ki, MDB-nin Sankt-Peterburqda keçirilən görüşü ənənəvi bir toplantıdır. Bu əslində qeyri-rəsmi toplantı sayılır.
“Bunun əsası Rusiya prezidentinin təşəbüsü ilə bir neçə il öncədən qoyulub. Bu cür görüşlər də davam etməkdədir. Hazırdakı toplantı isə daha çox Putinə lazımdır. Ukrayna savaşından dolayı Rusiya rəhbəri faktiki olaraq dünyada izloyasiya edilmiş vəziyyətdədir.
Həm Rusiya, həm də Qərb tərəfi Paşinyanı qeyri-ardıcıl və ikili fəaliyyət göstərən, siyasət yürüdən şəxs kimi tanınır. Bu ənənəvi bir Ermənistan siyasətinin, xüsusilə də Paşinyana xas olan davranış tərzidir”.
Siyasi analtik Asif Nərimanlının sözlərinə görə Bakı qəbul etməsə də, Paşinyan Fransanın vasitəçiliyinə, o cümlədən, üçtərəfli razılaşmalardan yayınmaq və Qarabağdakı separatçıları “qəbul edilməsi” məsələsində Parisin dəstəyinə ümid edir, eyni zamanda, BMT TŞ-də gözlənilən növbəti müzakirələrlə Bakının təkcə Laçın yolu məsələsində yox, sülh müqaviləsində də geriyə düşə biləcəyini “hesablayır”. O anlayır ki, Rusiya masasında sülh müqaviləsinin müzakirəsi Əliyevin üçtərəfli razılaşmaların icrası tələbinin kölgəsində keçəcək.
“Bunun fonunda Bayramovla Lavrov ikitərəfli görüşdüyü kimi, Əliyevlə Putin də eyni formatda müzakirələr apara bilər. Bakı-Moskva xəttində ciddi fikir ayrılığı olsa da, üçtərəfli razılaşmaların praktiki icrası məsələsində ortaq mövqelərin tapılması istisna deyil, xüsusilə Bakının davamlı gündəmdə saxladığı erməni silahlı dəstələrinin çıxarılması bəndi üzrə. Düz məntiq rusların sülh prosesində iştirakçılığının mövcud vəziyyətdə Bakının istədiklərini verməkdən keçdiyini deməyə əsas verir.
Bakı böyük ehtimalla praktiki addımlarının miqyasını beynəlxalq müstəvidə hazırlanan erməni təxribatının mümkün təsirlərinə uyğun müəyyən edəcək”.
Oğuz Ayvaz