“Artıq üç aydır ki, sosial və siyasi partlayışlar nümayişlər formasında, hər iki tərəfin - hakimiyyət və kütlə içində bir-birlərini öldürməsi, həbs edilmə, edam hökümləri bitib-tükənmir. Gözləmək olmaz ki, kütlə hər hansı bir yolla sakitləşəcək. Hakimiyyət yığılmış problemi həll edəcək qüdrətdə deyil”.
Bu sözləri Ednews-a İsveçdə yaşayan azərbaycanlı yazıçı Eluca Atalı İranda baş verən hadisələrlərə, proseslərə fikir bildirərkən deyib. O, qeyd edib ki, molla rejiminin ömrünə çox qalmayıb, deyə bilərsiniz ki, hökumətin əlində ordu, 17 növ gizli polis, iqtisadi güc və s. var. yəni bu qədər dayağı olan hakimiyyət necə ola bilər ki, getsin?! Bir məsələyə diqqət etməliyik hakimiyyətin ömrü ilə bağlı olan söhbətdə, kütlə idarəetmədən narazıdır. Hakimiyyətin xalq içində dayağı yoxdur.
“İşsizlik, iqtisadı haqsızlıq, milli ayrı-seçkilik, ana dilinin tək türklərə yox, bütün İran daxilində yaşayan ermənilərdən savayı heç kəsə verilməməsi daxili gərginliyi illərdi artırıb və getdikcə dərinləşməkdədir. İran İslam inqilabının baş vermə səbəbləri və fəsadlarından, inqilabın insanı yeməsindən bəhs edən "İran hizbullah zindanında" romanı yazmışam. İslam inqilabı tək İrana, oradakı türklərə yox, bütün millətlərə, bəşərə böyük fəlakət gətirdi. İslam inqilabından sonra hizbullahın yardımı ilə Şərq aləmində terror təşkilatları yarandı”.
Yazıçının sözlərinə görə heç bir inqilabın qələbəsi əbədi olmayıb.
“İlk əvvəl götürək Fransa burjua inqilabını, gilyotini yaradanın başı gilyotin baltası ilə kəsildi. İnqilabçılar bir-birlərini edam etdilər. Və ya uzun ömürlü olan Böyük Oktyabr sosialist inqilabı. Nə qaldı ondan? Hanı o Leninin, Stalinin möhtəşəm heykəlləri? 1988-də yenidənqurma başlananda bütün kommunistlər dönüb kapitalist oldular və heç kim də intihar etmədi. Çünki əqidə sahibləri deyildilər. İnqilablar insan yetişdirmir, insan faktorundan bəhrələnib hakimiyyətə gəlirlər, insanı tapdayıb onun üzərində hakimiyyət qururlar. İnqilablar insana gərək olan şüarı verib qələbə çalırlar, lakin heç bir şüar insana xidmət etmir. Lenin "Fabrik-zavod fəhləyə, torpaq kəndliyə" ideyası ilə hakimiyyətə gəlmədimi? Zavallı zəhmətkeşlərə nə verdilər. Həmçinin Xomeyninin inqilab ideyası, dini hakimiyyət ilk əvvəl insanların inancını oğurladı, insandakı müqəddəslik duyğusunu da ondan aldı”.
E.Atalı Cənubi Azərbaycandakı soydaşlarımızdan da bəhs etdi.
“Güney Azərbaycanda yüzlərlə soydaşımız hizbullah zindanındadır, son hadisələrdə edam olunanlar var və edam hökmü altında yatanlar var. Bununla bağlı Bakıdakı İran səfirliyinə niyə etiraz bildirilmir? Heç nə olmamış kimi səfirlik işinə davam edir. Mühacirətdə olan soydaşlarımız arasında Vətənə dönmək, orda yaşamaq, işləmək kimi arzular dilə gətirilir. Güney Azərbaycan müstəqil olandan sonra 1946-cı ildə Məhəmmədrza Pəhləvi hakimiyyəti tərəfindən öz qanında boğulmuş dövlətimizi bərpa etməliyik, onun yolu ilə getməliyik. Bu baxımdan bizə hər bir sahədə mütəxəsis lazım olacaq. Şəxsən mən özüm Güneydə biliyimi, enerjimi xərcləməyə hazıram”.
O, sonda bütün problemin Azərbaycanın ikiyə bölünməsindən başladığını vurğulayıb. Eluca Atalının fikrincə, Azərbaycanın bütövləşməsi ilə siyasi dərdimiz sağalacaq, Qarabağın da biryolluq həlli olacaq.
Oğuz Ayvaz