“İran terrorçuluğu dəstəkləyən ölkə olmaqla yanaşı, həm də terrora sponsorluq edən tərəfdir. Bu artıq bir sıra ölkələr tərəfindən qəbul edilsə də, hələ rəsmiləşdirilməyib. Bununla yanaşı, bir sıra dövlətlər artıq İranı təhlükəli ölkələrdən biri kimi tanımağa başlayıb. Bu səbəbdən də yaxın günlərdə Azərbaycandan sonra Böyük Britaniya və Almaniyanın da oxşar addımlar atacağı gözlənilir”.
Orta Doğu Araşdırmalar Mərkəzinin rəhbəri, politoloq Sədrəddin Soltan bu sözləri Ednews-a açıqlaması zamanı deyib.
Ekspert deyib ki, Azərbaycanın Tehrandakı səfirliyində baş verənlər fonunda digər ölkələr ehtiyat tədbirlərini xeyli gücləndirib. Onu sözlərinə görə bu proses iki istiqamətdə gedə bilər: “Ola bilsin bəzi ölkələr səfirliklərinin fəaliyyətini tamam dayandırsın, ya da diplomatik əlaqələri qismən aşağı salsın”, deyə S.Soltan vurğulayıb.
Politoloq həmçinin ötən gün İsfahanda hərbi hissəyə endirilən ani raket zərbəsi ilə bağı müəmmalı məqamlara da toxunub. O, bildirib ki, İranla yanaşı, İsrail mediası da baş verənlərlə bağlı müxtəlif versiyalar yaymaqdadır. Sədrəddin Soltanın sözlərinə görə bu hadisənin məhz İranın özü tərəfindən törədilməsi istisna hal deyil.
“İran bəzən bu cür terror aktlarını öz vətəndaşlarına, xüsusilə tanınmış şəxslərə, alimlərə və siyasi xadimlər qarşı təşkil edə bilər. Rejim bunu ona qarşı gələn tərəflərə qarşı törədərək, sonrada cinayəti digər ölkələrin adına yaxmağa çalışır. İsfahandakı hadisəni də İranın özü törətməsi bəzi iddialarla uzlaşır və görünür ki, İran bir müddət sonra zərbə nəticəsində guya vətəndaşlarının tələf olması ilə bağlı hər hansı bəhanəni irəli sürə bilsin”.
Elnur Ənvəroğlu