Ermənistan Hindistandan Rusiyaya alternativ ixracat yolu təklif edib. Bununla da erməni hakimiyyəti Azərbaycandan keçən mövcud yollarından imtina etməyə çağırırlar.
Ermənistan Hindistandan almaq istədiyi 155 mm-lik “MArG” özüyeriyən haubitsalarının sınağını keçirib. Bu barədə yazan Hindistan mediası Ermənistan nümayəndə heyətinin iştirakı ilə sınaqların tam 40 gün davam etdiyini bildirib. Bu isə sınaq deyil, iddialara görə erməni hərbçilər 40 gün müddətində haubitsalardan istifadəni öyrənərək praktikada təcrübədən keçiriblər.
Artıq bu haubitsaların Ermənistan tərəfindən sifariş edildiyi vurğulanıb, ancaq müqavilənin dəyəri açıqlanmayıb.
Məsələ ilə bağlı Ednews-a politoloq Tofiq Abbaslı şərh verib. Onun sözlərinə görə Ermənistan Azərbaycanla qarşıdurma prosesinə qatıldıqdan sonra demək olar ki, nifrət, kin-küdurət siyasətindən başqa heç bir şeyə hazırlıq nümayiş etdirə bilmir.
“Biz görürük ki, bütün proseslərdə, hətta dünyanın əksər qüvvələri, məmləkətlərinin rəhbərləri Azərbaycanın irəli sürdüyü təşəbbüslərə “hə” deyirsə, Ermənistan bir qayda olaraq onlara “yox” deyir, onları inkar edir və bu inkar siyasətindən də artıq əl çəkə bilmir. Əslində dövlətlər arasında olan ədavət, ixtilaflar adi bir şeydir. İstər-istəməz onlardan da tərəflər yorulurlar və gəlib belə bir məntiqə çatırlar ki, qarışdırma oldu, bəsdir, ondan biz heç bir şey qazana bilmədik, indi isə gəlin birgə mənfəət əldə edək. Görünür Ermənistan üçün bax bu məfkurə uyğun deyil. Onlar bütün proseslərdə Azərbaycanın irəli sürdüyü planlardı, proqramlardı, layihələrdi, təşəbbüslərdi onlara bir qayda olaraq neqativ münasibət bildirirlər. Çalışırlar ki, Azərbaycanın təklifləri əsasında alternativlər yaratsınlar. Bu proseslərdə də onların bədbəxtçiliyi ondan ibarətdir ki, ambisiyaları hər şeyi üstələyir. Bacarıq, qabiliyyət, resurs bazası yox, amma tək istəkləri Azərbaycanın proseslərə verdiyi payların, töhfələrin qarşını alsınlar”.
Politoloq əlavə etdi ki, müəyyən ölkələr - Fransa, Hindistan, İran Ermənistanın arxasındadılar:
“Ermənistanın çıxış yolu Azərbaycanla Türkiyənin olduğu proyektlərdə, layihələrdə sakitcə iştirak etməsidir. Ermənistanın Hindistan kömək istəməsi isə boş məsələdir. Şimal-cənub nəqliyyat dəhlizinin 4 xətti var. Biri Türkmənistan-Qazaxıstan yolundan keçir, digəri Xəzər dənizinin ortası ilə gedir, sonra Azərbaycanın və hipotetik, həm də guya Ermənistanın imkanlarından istifadə etməklə ordan da dəhliz keçə bilər, ancaq Ermənistanın bunun üçün heç bir hazırlığı yoxdur.
İran, Hindistan Ermənistana investisiya qoymaq istəmirlər. Hindistan da ancaq silah-sursat verir. Bəzi ölkələr həqiqətən də Qafqazda gərginlik yaratmaq istəyirlər. Bu da Ermənistana xoş gəlir. Ancaq Ermənistan başa düşmür ki, daha bir müharibə olsa onların özündən heç nə qalmayacaq”.
Oğuz
