Xəbər verildiyi kimi, Azərbaycanın Naxçıvan Muxtar Respublikasının Şahbuz rayonunun Ermənistanla sərhəd ərazisində əlverişsiz hava şəraitində məhdud görmə səbəbindən azaraq itkin düşən iki Azərbaycan əsgərini ermənilər döyüb və igəncə veriblər. İşgəncə ilə bağlı foto və videolar isə “Baqramyan26” erməni teleqram kanalı (Ermənistan hökumətinə aiddir) yayıb.
Ednews əsir düşən iki əsgərimizlə bağlı son sutka ərzində ölkənin rəsmi qurumları və beynəlxalq təşkilatlar tərəfindən açıqlanan məlumatların rəsmi xronikasını təqdim edir:
Azərbaycan Respublikasının İnsan Hüquqları üzrə Müvəkkili (Ombudsman) Səbinə Əliyeva:
Beynəlxalq təşkilatlara müraciət edilib. Beynəlxalq Qızıl Xaç Komitəsinin Ermənistandakı nümayəndəliyindən təcili olaraq hərbi qulluqçularımıza baş çəkməyi və onların vəziyyəti ilə bağlı məlumatların verilməsi tələb edilib
Azərbaycan Respublikasının Baş Prokurorluğu:
İstintaq idarəsində Cinayət Məcəlləsinin 115.2 (əsir düşmüş şəxslərə işgəncə vermə, onlara qəddar və ya qeyri-insani rəftar etmə) maddəsi ilə cinayət işi başlanıb.
Azərbaycan Xarici İşlər Nazirliyi:
Ermənistan tərəfindən saxlanılan Azərbaycan hərbi qulluqçusuna qarşı işgəncə və qeyri-insani rəfatrı görmək üçün beynəlxalq ictimaiyyətə çağırış edilib. Hərbçilərimizə qarşı törədilən işgəncə ilə bağlı beynəlxalq təşkilatlar məlumatlandırılıb.
Qərbi Azərbaycan İcması:
Qərbi Azərbaycan İcması Ermənistanda Azərbaycan hərbçisinə işgəncə verilməsini pisləyib. Qərbi Azərbaycan İcması bu mənfur cinayəti qəti şəkildə qınayır, beynəlxalq ictimaiyyəti buna görə Ermənistan hökumətinin və cinayətin icraçılarının əməlinə hüquqi qiymət verməyə və əlverişsiz hava şəraiti ilə əlaqədar yolu azaraq Ermənistanın nəzarətində olan əraziyə keçmiş azərbaycanlı hərbi qulluqçuların dərhal və qeyd-şərtsiz azad edilməsini təmin etməyə çağırır.
Avropa İttifaqının Azərbaycandakı səfiri Peter Mixalko:
Azərbaycan hərbçisinə qarşı qeyri-insani rəftarın əks olunduğu görüntüləri “çox təəssüfləndirici” adlandırıb.
Əsir və itkin düşmüş,girov götürülmüş vətəndaşlarla əlaqədar Dovlət Komissiyası:
Bir daha beynəlxalq humanitar hüquq normalarına uyğun davranılması tələb edilib.
Beynəlxalq Qızıl Xaç Komitəsinin Azərbaycan nümayəndəliyinin ictimaiyyətlə əlaqələr şöbəsinin rəhbəri İlahə Hüseynova:
Beynəlxalq Qızıl Xaç Komitəsi (BQXK) Ermənistanda saxlanılan iki Azərbaycan hərbçisinin məsələsi barədə məlumatlıdır.
Bu gün ən son isə ABŞ və Britaniyanın Azərbaycandakı səfirlikləri baş verən olaylarla bağlı mövqelərini açıqlayıblar. Diplomatik korpus təmsilçiləri Ermənistanda əsgərimizə işgəncə verilməsindən çox narahat olduqlarını bəyan ediblər.
Qeyd edək ki, bir neçə gün əvvəl Naxçıvan Muxtar Respublikasının Şahbuz rayonunun Ermənistanla sərhədboyu ərazisində əlverişsiz hava şəraitində məhdud görmə səbəbindən Azərbaycan ordusunun itkin düşmüş əsgərləri - 2004-cü il təvəllüdlü Bəbirov Aqşin Qabil oğlu və 2003-cü il təvəllüdlü Axundov Hüseyn Əhliman oğlu Ermənistan tərəfindən əsir götürülüb. Sosial şəbəkələrdə yayılmış videogörüntülərin birində əsir götürülmüş Axundov Hüseyn Əhliman oğluna qarşı fiziki işgəncə və qeyri-insani rəftar halları əks olunub.
Aysel Şahmar