“Danışıqlar prosesində anklavlarla bağlı müxtəlif müzakirələr və ssenarilər var”.
Bunu Ermənistanın ərazi idarəetmə və infrastruktur naziri Qnel Sanosyan parlamentdə jurnalistlərin suallarını cavablandırarkən deyib. Q.Sanosyan anklavlar məsələsində həll yolu axtardıqlarını bildirib:
“Anklavların Azərbaycanın nəzarətinə keçəcəyi təqdirdə, alternativ nəqliyyat yollarının tapılacaq”.
Məsələ necə çözülə bilər? Ermənilər artıq öz dilləri ilə Azərbaycanın şərtlərini qəbul etdikərini etiraf edirlər? Həmçinin Ermənistan prezidenti Vaaqn Xaçaturyan baş nazir Nikol Paşinyanın rəsmi İrəvanın Azərbaycanın ərazi bütövlüyünü tanımasına dair açıqlamasını müsbət dəyərləndirib.
Mövzu ilə bağlı Ednews-a politoloq İlyas Hüseynov bildirib ki, ötən ilin oktyabrında Ermənistan Azərbaycanın ərazi bütövlüyünü və suverenliyini Praqa görüşündə təsdiqlədi.
“Ardınca bu ilin may ayının 14-də Brüsseldə cənab Prezident İlham Əliyev və Ermənistanın baş naziri Nikol Paşinyan arasında keçirilən görüşdən sonra Azərbaycanın 86,6 min kv. km. ərazisi Ermənistan tərəfindən qəbul olundu. Bu həm də o anlama gəlir ki, anklavlar məsələsi böyük ölçüdə həll olunur. Yəni, Ermənistanın işğalda saxladığı Qazaxın 7 kəndi və Naxçıvanın Kərki kəndi Azərbaycana verilməlidir. Çünki beynəlxalq səviyyədə tanınmış sənədlərimiz Ermənistan tərəfindən öz təsdiqini tapıb. Xüsusilə vurğulamaq istəyirəm ki, bu kəndlər üzərində olan yollar strateji əhəmiyyətə malikdir. Kərki kəndi üzərindən strateji M-10 yolu Ermənistan və İran əlaqələri üzərindədir. Qazaxın 7 kəndi isə Ermənistan, Gürcüstan bağlantısı üzərindən keçir. Bu komunikasiya xətlərinin Azərbaycanın nəzarətinə keçməsi ölkəmizin strateji əhəmiyyətini bir qədər də artırır”.
Politoloqun sözlərinə görə, Ermənistan prezidenti Vaaqn Xaçaturyanın baş nazir Nikol Paşinyanın açıqlamalarını müsbət dəyərləndirməsi də onu deməyə əsas verir ki, Ermənistanda hakimiyyətin yuxarı eşalonlarından olan şəxslər məhz danışıqların gedişini izləyir və ona adekvat cavab verirlər:
“Lakin zaman-zaman sülh prosesinə qarşı siyasi açıqlamaları, fikirləri, bəyanatları müşahidə edirik. Eyni zamanda hərbi, siyasi vəziyyətin gərginləşdirilməsi istiqamətində də həmlələr olur. Amma, düşünürəm ki, Azərbaycan diplomatiyasının hazırda həyata keçirdiyi fəaliyyət Ermənistanı sülhə məcbur etmə əməliyyatının mühüm tərkib hissəsidir”.
Oğuz