Qazaxın işğaldakı 7 kəndi və Kərki kəndi ilə Başkəndin dəyişdirilməsi mümkündürmü və strateji əhəmiyyətinə görə, bu kəndlərin hansı daha əhəmiyyətlidir? Bəzi iddialara görə Başkənd əslində daha strateji əhəmiyyətə malikdir, ona görə də həmin ərazini Ermənistana vermək olmaz. Belədirmi?

Ermənistanla delimitasiya və demarkasiya zamanı ərazi dəyişmək mümkündürmü?

Bu barədə Ednews-a Azad Vətən Partiyasının sədri Akif Nağı bildirdi ki, ermənilərin şərtlərlə danışması absurddur:

“Onlar Azərbaycana qarşı cinayət törədib, torpaqlarımızı işğal edib, 30 il ərzində sərvətlərimizi talan edib, soyqırım törədib, minlərlə insanımızı qətlə yetiriblər. Bütün bunlardan sonra Ermənistanın hansısa şərt irəli sürməsinə yol vermək olmaz”.

Partiya sədrinin qeyd edib ki, Azərbaycan Vətən müharibəsində zəfər çalıb, qalib tərəf kimi də şərtləri biz irəli sürməliyik: 

“Başkənd Azərbaycana məxsus yaşayış məntəqəsidir, sovet işğalı dövründə ermənilərə otlaq yeri kimi müvəqqəti istifadəyə verilmişdi. 1992-ci ildə həm ermənilərin daimi təxribatlarını, həm qanuni haqlarımızın bərpa olunmasının vacibliyini nəzərə almaqla həmin yaşayış məntəqəsində hakimiyyətimizi bərpa etmişik. Ona görə də qanuni torpaqlarımızı heç bir halda güzəştə getməməliyik. Digər tərəfdən , Başkənd ciddi strateji əhəmiyyətə malikdir, həmin yüksəklik geniş əraziyə nəzarət üçün vacibdir. Ermənilərə siyasi möhtəkirlik imkanı verməməliyik. Qazaxın 7, Sədərəyin 1 kəndi Azərbaycanın qanuni yaşayış məntəqələridir. Bunu dünya da, SSRİ-nin bütün xəritələri də təsdiq edir. Onlar qeyd-şərtsiz Azərbaycana qaytarılmalıdır”.

Oğuz