“Siyasi partiyalar haqqında” qanuna əsasən, yenidən qeydiyyatdan keçmək üçün partiyalar iyulun 11-dək Ədliyyə Nazirliyinə müraciət etməlidir. Bunun üçün siyasi partiyanın 5000 üzvü olmalıdır.

Ednews bir neçə partiya sədri ilə əlaqə saxlayıb, qeydiyyat prosesinin gedişi ilə maraqlanıb.

Azad Vətən Partiyasının sədri Akif Nağı Ednews-a açıqlamasında bildirdi ki, sənədlərin təqdim edilməsi prosesi bu gün başa çatdı. 

“Bizim partiya iyulun 5-də sənədlərini təqdim edib. 6245 nəfər üvümüz var. Yəqin ki, yoxlama prosesi aparılacaq. Bir aya qədər məlumat veriləcək. Hesab edirəm ki, yaxşı proses oldu. Həm təşkilatlanma, həm partiyaların təbliğatı baxımından vacib oldu. Dəfələrlə demişəm, təkrar deyirəm ki, partiyalar dövlətin, millətin idarə olunmasında əsas funksiya rolu oynayır. Partiyalar bu işi həyata keçirməlidir. Bunu hər kəs başa düşməlidir. Partiyalara qarşı biganəlik var, amma yavaş-yavaş bu da aradan qalxacaq. 

Böyük Azərbaycan Partiyasının (BAP) sədri Elşad Musayev bildirdi ki, proporsional seçki sisteminin ləğv olunması siyasi partiyaların fəaliyyətinə mənfi təsir edib:

“Siyahını hazırlayıb Ədliyyə Nazirliyinə təhvil vermişik. Son məlumata görə, siyahıda 7388 nəfər var. 31 partiya isə özünü buraxdı. Bu, onların daxili işidir. Verilən qərarlara hörmətlə yanaşmaq lazımdır. Ölkədə hələ ki, nisbi majoritar seçki sistemi tətbiq olunur. Nisbi majoritar sistemdən fərqli olaraq mütləq majoritar sistemdə namizəd 50+1 faizlə qalib gəlir. Nisbi majoritar sistemdə isə qalib sadə səs çoxluğu ilə seçilir. Proporsional seçki sisteminin ləğv olunması siyasi partiyaların fəaliyyətinə mənfi təsir etdi. Bu sistemin tətbiq edilib-edilməyəcəyini dəqiq demək mümkün deyil. Ölkə başçısı çıxışlarında majoritar sistemin üstünlüklərindən danışıb. Mən qarışıq sistemin tərəfdarıyam. Nəhayət ki, parlamentdə partiyaların fraksiyaları olmalıdır. O cümlədən parlamentin səlahiyyəti xeyli genişlənməlidir. Ölkədə seçki və siyasi sistemi əhatə edən hərtərəfli islahat həyata keçirilməlidir”.

Ana Vətən Partiyasının sədri Fəzail Ağamalı açıqlamasında bildirib ki, Ədliyyə Nazirliyinə iyunun 4-də müraciət edilib. Partiya sədri qeyd edib ki, fəaliyyət “Siyasi partiyalar haqqında” yeni qanuna əsasən qurulacaq:

“Partiyamızın 6150 üzvü var. Bütün partiyalar üçün prioritet seçki prosesində iştirak etməkdir. Proporsional seçki sisteminin tətbiqi üçün Konstitusiyada dəyişiklik edilməlidir. Azərbaycanda qarışıq seçki sisteminin tətbiqi daha məqbuldur. Proporsional seçki sistemi siyasi sistemdə partiyaların yerinin və rolunun güclənməsinə, ölkə Prezidentinin siyasi islahatlarında yer alan yeni partiyaların konfiqurasiyasının inkişafına tamamilə uyğundur. Majoritar sistemin seçki prosesində yer alması doğru olardı”.

Oğuz