Birləşmiş Ştatlar Azərbaycan və Ermənistanı birbaşa dialoq yolu ilə həll edilməmiş məsələlərin həlli üçün birgə fəaliyyəti davam etdirməyə çağırıb.
Bunu ABŞ dövlət katibi Entoni Blinken mətbuata açıqlamasında deyib.
Azərbaycan-Ermənistan cəbhəsində vəziyyət necədir? ABŞ-ın bəyanatında məqsəd nədir? Qərb ölkələrinin Ermənistanı münaqişəyə cəlb etmək fikri varmı?
Erməni fəal və bloqqer İşxan Verdyan ABŞ dövlət katibi Antoni Blinkenin bəyanatını Ednews-a şərh edib.
Bloqqerin fikrincə, ABŞ dövlət katibi Blinkenin bəyanatları böyük ehtimalla deklarativ və reputasiya xarakteri daşıyır.
“Birləşmiş Ştatlar özünü Azərbaycan və Ermənistan arasında danışıqlarda fəal vasitəçi kimi göstərir, bir həftəlik danışıqlar sessiyaları təşkil edir, münaqişənin həllində yüksək dərəcədə maraqlı olduğunu göstərmək üçün əlindən gələni edir və onlar vəziyyət həqiqətən gərginləşəndə susa bilmirlər: bu onların reputasiyasına xələl gətirə bilər. Səhv edə bilərəm, amma ABŞ-ın Ermənistan hökumətini aşkar, düzgün addımlar atmağa inandıra bilmədiyinə inanmaqda çətinlik çəkirəm. Bu, ABŞ-ın ATƏT-in Minsk Qrupunun bir hissəsi kimi münaqişənin fəal moderatoru olduğu və tərəfləri həqiqətən bir-birinə daha da yaxınlaşdırmaq üçün barmağını belə qaldırmadığı otuz il ərzində aydın şəkildə görünür.
Qərb dövlətlərinin Ermənistan və Azərbaycanı münaqişəyə cəlb etmək fikri yoxdur. Plan bu münaqişəni mümkün qədər uzatmaq və ya Ermənistan ərazisindən keçən türk dövlətləri arasında kommunikasiyaların bu türk dövlətlərinin, yaxud onların sadiq tərəfdaşlarının nəzarətindən kənarda qaldığı status-kvonun yaranmasına gətirib çıxarmaqdır. Bu halda biz Ermənistanı nəzərdə tuturuq. Ermənistanı türk ölkələrinə sadiq adlandırmaq olmaz və Qərbin məqsədi hər şey olduğu kimi qalmasında əmin olmaqdır.
Heç kimin qlobal oyunçuların niyyətləri ilə bağlı illüziyaları olmamalıdır. ATƏT-in Minsk Qrupu özünün fəlakətli təcrübəsi ilə Qərb dövlətlərinin Rusiya ilə birgə konkret olaraq nəyə nail olmağa çalışdığını bizə tam aydınlaşdırdı. Onlar iqtisadi Turanın yaranma ehtimalını - Türkiyə təsirinin Ermənistan vasitəsilə nəzarətsiz şəkildə Azərbaycana, daha da Orta Asiya ölkələrinə yayılmasını istisna etməyə çalışırlar. Onlar çox gözəl anlayırlar ki, hadisələrin bu cür inkişafı halında qitənin geosiyasi xəritəsi dəyişəcək, Türkiyə öz təsir imkanları baxımından regional lider, hətta, Çinin də fikrini nəzərə alacaq bir ölkəyə çevriləcək. Dünya gücləri məhz bunun qarşısını almağa çalışırlar və Ermənistan-Azərbaycan münaqişəsini anlamağın açarı buradadır. Qlobal Qərbin ermənilərin və azərbaycanlıların qiyamətə qədər bir-birini “qırması” yox, Türkiyənin inkişafını dayandırmaqdır”.
Nurlana Hacıyeva
