“Azərbaycanda azad, demokratik və şəffaf seçkilərin keçirilməsi üçün bütün şərait mövcuddur. Ölkəmizdə ictimai-siyasi sabitlik hökm sürür və bu, seçkilərin normal keçirilməsi üçün vacib şərtlərdən biridir. Azərbaycanda azad və şəffaf seçkilərin keçirilməsi üçün mükəmməl qanunvericilik bazası mövcuddur. Seçki Məcəlləsi, bu sahəni əhatə edən qanun və qərarların mövcudluğu ölkəmizdə beynəlxalq standartlara uyğun seçki qanunvericiliyinin olduğunu təsdiq edir, zərurət yarandıqca seçki qanunvericiliyi təkmilləşdirilir ki, bu da seçkilərin ölkəmizdə daha şəffaf keçirilməsinə xidmət edir”.
Ednews xəbər verir ki, bu fikirləri Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib. Deputat bildirib ki, Azərbaycan dövlətinin 7 fevral seçkilərinin də azad və şəffaf keçirilməsi üçün güclü siyasi iradəsi mövcuddur.
"Bu seçkilərdə ölkə vətəndaşları, seçicilər sərbəst şəkildə seçki məntəqələrinə gəlib istədikləri namizədə səs verəcəklər. Hesab edirəm ki, bu seçkilər Azərbaycanın demokratik inkişaf yolunda növbəti bir nailiyyəti olacaq. Mərkəzi Seçki Komissiyası, aşağı seçki komissiyaları prezident seçkiləri ilə əlaqədar üzərinə düşən vəzifələri layiqincə yerinə yetirirlər. Həmçinin seçki proseslərinin uğurlu təşkili və həyata keçirilməsi üçün maddi-texniki təminat məsələləri yüksək səviyyədə həllini tapıb. Eyni zamanda, seçkilərə beynəlxalq səviyyədə də maraq böyükdür. Çoxsaylı beynəlxalq müşahidəçilərin prosesi izləmək üçün müraciət etməsi də bunu təsdiqləyir.
Millət vəkilinin sözlərinə görə, ölkəmizdə seçki əhval ruhiyyəsi yüksəkdir. 7 nəfərin seçki marafonuna qoşulması fəal kampaniyanın aparılmasından xəbər verir. Yeni Azərbaycan Partiyası seçkilərə “Qalib xalqın qalib Lideri!” şüarı ilə gedir. Partiyamızın namizədi cənab İlham Əliyevdir. Şübhə yoxdur ki, fevralın 7-də keçiriləcək prezident seçkilərində xalqımız növbəti dəfə cənab İlham Əliyevə yüksək etimad göstərəcək. Hesab edirəm ki, cənab İlham Əliyevin alternativi yoxdur və qarşıdan gələn seçkilərdə parlaq qələbə qazanacaq. Və növbəti 7 il ərzində Prezident İlham Əliyevin rəhbərliyi ilə Azərbaycan daha möhtəşəm nailiyyətlər əldə edəcək".
Deputat vurğulayıb ki, suverenliyimizin tam bərpasından sonra Azərabycanda və regionda yeni reallıqlar yaranıb:
"Bu reallıqların müəllifi də məhz Prezident İlham Əliyevdir. Ərazi bütövlüyünün və suverliyimizin təmin olunması Prezident İlham Əliyevin 20 illik fəaliyyətinin zirvəsini təşkil edir. Xalq hər zaman Prezident İlham Əliyevin siyasətini dəstəkləyib və bundan sonra da dəstəkləyəcək. Xüsusilə qeyd etmək lazımdır ki, müstəqil Azərbaycan tarixində ilk dəfə olaraq seçkilər bütün ölkə ərazisində keçiriləcək. Ona görə də, bu seçkilər Zəfər seçkisi kimi xarakterizə olunur. Bütün bunların fonunda fevralın 7-də keçiriləcək prezident seçkiləri cənab İlham Əliyevin özünəinamının, xalqın siyasi dəstəyinə əminliyinin ən bariz göstəricisidir. Çünki Prezident İlham Əliyev bu günə qədər verdiyi hər bir vədi uğurla həyata keçirib. Tarixi Zəfərdən sonra Azərbaycanın nəinki regionda, o cümlədən beynəlxalq müstəvidə də mövqeləri əhəmiyyətli dərəcədə güclənib. Eyni zamanda, qarşıda yenə də müəyyən hədəflərimiz var ki, Prezident İlham Əliyevin liderliyi ilə buna nail olacağımız şübhəsizdir. Ona görə də, qarşıdan gələn prezident seçkilərində İlham Əliyevin qələbəsi milli maraqlarımızın gələcəkdə də uğurla təmin olunması baxımından başlıca şərtdir”.
Əkbər Novruz